कर्नाटकातील विजापूर जिल्ह्यातील चडचणमध्ये स्टेट बँक ऑफ इंडियावर सशस्त्र दरोडा टाकण्यात आला. अवघ्या कर्नाटकात या सशस्त्र दरोड्यामुळे खळबळ माजली होती. कर्नाटक पोलिसांनी या प्रकरणाच कसून तपास केला असता या प्रकरणाचे सोलापूर कनेक्शन खरंतर उघड झाले आहे. मंगळवेढा या ठिकाणी कर्नाटक पोलिसांच्या तपासाअंती अनेक धक्कादायक अशा बाबी आढळून आल्या आहेत.
कर्नाटकात दरोडा; मंगळवेढा कनेक्शन
कर्नाटकातील विजापूर जिल्ह्यातील चडचणमध्ये स्टेट बँक ऑफ इंडियावर सशस्त्र दरोडा टाकण्यात आला. या दरोड्यात बँकेच्या लॉकरमधील कोट्यवधी रुपयांचे सोने आणि रोकड लंपास झाले होते. दरोड्यात वापरण्यात आलेली मारुती कार ही मंगळवेढा तालुक्यातील आंधळगाव येथून 8 सप्टेंबर रोजी चोरीला गेल्याचे उघड झाले होते. हीच कार दरोडा घालून पळताना हुलजंती येथे अपघातग्रस्त अवस्थेत पोलिसांच्या हाती लागली. त्यातून रोकड आणि सोन्याचे काही दागिने मिळाले. यानंतर केवळ दोन दिवसांत हुलजंती येथील जुन्या घराच्या पत्र्यावर ठेवलेली बॅग पोलिसांना सापडली. त्यामध्ये साडेसहा किलो सोने आणि तब्बल ४१ लाख ४ हजार रुपये रोख रक्कम मिळाल्याचे कर्नाटक पोलिसांनी सांगितले.
या गुन्ह्यात वापरलेली मारुती कार मंगळवेढा तालुक्यातील आंधळगावातून चोरण्यात आल्याचे समोर आले होते. ही कार मंगळवेढ्यातून आठ सप्टेंबर रोजी चोरी करण्यात आल्याचे समोर आले आहे. दरोड्यात ही कार वापरण्यापूर्वी चोरट्यांनी कारची नंबर प्लेट बदलली होती. ही कार मूळ साताऱ्याच्या मालकाची असून त्याने कोल्हापूरच्या एजंटमार्फत मंगळवेढ्यातील आंधळगाव येथे त्याची विक्री केली होती. त्यामुळे या कारने पोलिसांच्या तपासातील गुंता चांगलाच वाढवला आहे.
फिल्मी स्टाईलने कोट्यवधींचा दरोडा
कर्नाटकच्या चडचण परिसरातील भीमातीर येथील स्टेट बँक ऑफ इंडियाच्या शाखेवर मंगळवारी संध्याकाळी साडे सहा वाजण्याच्या सुमारास दरोडा पडल्याची घटना घडली. कर्मचारी गेटला कुलूप न लावता काम करत असताना, तीन मुखवटा घातलेले लोक शाखेत घुसले आणि त्यांनी कर्मचाऱ्यांना पिस्तूल आणि चाकूने धमकावले. त्यानंतर बँक कर्मचाऱ्यांकडून स्ट्राँग रूममधून माहिती काढत त्यांना नंतर बांधून ठेवले होते.
घटनेनंतर चोरट्यांनी अवघ्या २० मिनिटांत बँक लुटली आणि ते पसार झाले होते. या दरम्यान एका ग्राहकाने बँकेत जाऊन पाहिले असता काही कर्मचाऱ्यांचे हात बांधलेले होते आणि तोंड देखील बांधलेले होते. त्यानंतर बॅक कर्मचाऱ्यांची सुटका झाल्यानंतर पोलिसांना या घटनेची माहिती देण्यात आली होती. त्यानंतर पोलिसांनी घटनास्थळी धाव घेऊन तपासाला सुरुवात केली.
