मनोज जरांगे पाटलांच्या हत्येच्या कटाच्या प्रकरणावरून आरोप प्रत्यारोपांची अक्षरश राळ उठलीय. दरम्यान अंतरवालीत मोठ्या घडामोडी होत असून भाजप आमदार सुरेश धस जरांगे पाटलांच्या भेटीसाठी अंतरवालीमध्ये दाखल झाले होते. दोघांमध्ये बराच काळ चर्चा झाल्याची माहिती समोर येत आहे.
सुरेश धस मनोज जरांगेंच्या भेटीला
मराठा आंदोलक मनोज जरांगे पाटील आणि अजितदादांच्या राष्ट्रवादी काँग्रेसचे आमदार धनजंय मुंडे यांच्यात आरोप-प्रत्यारोपांच्या फैरी झडू लागल्या आहेत. मनोज जरांगे पाटलांनी माजी मंत्री धनंजय मुंडेंवर खळबळजनक आरोप केलाय. धनंजय मुंडेंनी मला मारण्यासाठी अडीच कोटी रुपयांची सुपारी दिली, असा गंभीर आरोप जरांगेंनी केला. बीडमधून अमोल खुणे आणि दादा गरुड या दोघांना पोलिसांनी ताब्यात घेतलं होतं. आता जरांगेंनी या प्रकरणात धक्कादायक आरोप केले मात्र मुंडेंनी हे आरोप फेटाळून लावलेत. यानंतर काही नेते जरांगेंच्या भेटीसाठी अंतरवाली सराटीत जाताना दिसत आहेत.
जरांगेंच्या भेटीसाठी आमदार नारायण कुचे हे देखील आले. त्यापाठोपाठ आता सुरेश धस जरांगे पाटील यांच्या भेटीसाठी दाखल झाले. सुरेश धस आणि जरांगे पाटील यांच्यामध्ये चर्चा सुरु असून आपल्याला जीवे मारण्याच्या कट उघड झाल्या नंतर त्या सगळ्या गोष्टी संदर्भात जरांगे पाटील संवादच्या माध्यमातून धस यांना माहिती दिली. त्यामुळे दोन्ही नेत्यांमध्ये नेमकी काय चर्चा झाली, ते गुलदस्त्यात आहे.
मनोज जरांगेंचा मोठा गौप्यस्फोट
तर राज्याचे माजी मंत्री धनंजय मुंडेंवर गंभीर आरोप करत “धनंजय मुंडे यांनी माझी सुपारी दिली होती” असा गंभीर आरोप मनोज जरांगे यांनी केल्याने राज्यात खळबळ उडाली आहे. “धनंजय मुंडेंकडून माझ्याविरोधात षडयंत्र करण्यात आले. माझ्या हत्येच्या कट रचण्यासाठी बीडमध्ये गुप्त बैठका करण्यात आल्या असा दावा देखील यावेळी जरांगे पाटील यांनी केला. तसेच धनंजय मुंडे यांनी आरोपींची सह्याद्री रेस्ट हाऊससमोर भाऊबीजेच्या दिवशी भेट घेतली. मला गाडी द्या आम्ही आम्ही गाडीने ठोकतो असं आरोपी म्हणाले. तर माझ्याकडे जुनी गाडी आहे बाहेरच्या पार्सिंगची ती घ्या असं मुंडे म्हणाले असल्याचा दावा मनोज जरांगे पाटील यांनी या पत्रकार परिषदेमध्ये केला. एवढंच नव्हे तर मनोज जरांगेंनी पुरावे म्हणून काही रेकॉर्डींग्सही ऐकवली.
धनंजय मुंडेंनीही दिले खुले चॅलेंज
जरांगेंच्या सनसनाटी आरोपांनंतर धनंजय मुंडे आक्रमक झालेत.. याप्रकरणाची सीबीआय चौकशी करण्याचं आवाहन मुंडेंनी केलीय. हा कट रचण्यासाठी आरोपींची धनंजय मुंडेंसोबत बैठक झाल्याचा आरोपही जरांगेंनी केलाय, त्यालाही धनंजय मुंडेंनी उत्तर दिलंय. जरांगेंविरोधात कट रचणाऱ्या आरोपी दादा गरडचा कबुली देतानाचा व्हिडिओही समोर आलाय.. आपली आणि जरांगेची ब्रेनमॅपिंग, नार्को टेस्ट करा असं आव्हान मुंडेंनी केलेलं हे आव्हान जरांगेंनी स्वीकारलं आहे. त्यामुळे हा वाद चांगल्याच वाढण्याची चिन्हं दिसत आहेत.
