Aryan Khan : शाहरुख खानचा मुलगा आर्यन खान पुन्हा एकदा वादाच्या भोवऱ्यात सापडला आहे. बेंगळुरूमधील एका पबमधून त्याचा अश्लील वर्तनाचा alleged व्हिडिओ समोर येताच सोशल मीडियावर मोठी खळबळ माजली आहे. 28 नोव्हेंबर रोजी घडलेल्या या घटनेमध्ये आर्यनसोबत काही राजकीय घराण्यांतील नेत्यांचे पुत्रही उपस्थित असल्याचे समोर आले असून प्रकरणाला नवी दिशा मिळाली आहे.
नेमकं काय आहे प्रकरण?
मिळालेल्या माहितीनुसार, आर्यन खान (Aryan Khan) एका खाजगी पार्टीसाठी बेंगळुरूला गेला होता. रात्री उशिरा तो अशोकनगर पोलीस स्टेशनजवळील एका लोकप्रिय पबमध्ये दिसला. त्याच ठिकाणाहून बाहेर येताना कॅमेऱ्यात कैद झालेल्या एका व्हिडिओमध्ये आर्यनने जमलेल्या नागरिकांकडे व चाहत्यांकडे मिडल फिंगर दाखविल्याचा दावा करण्यात आला आहे. हा व्हिडिओ व्हायरल होताच त्यावर टीकांची झोड उठली.
व्हायरल फुटेजमध्ये आर्यनसोबत कन्नड अभिनेता झैद खान, कर्नाटकातील मंत्री जमीर अहमद खान यांचा मुलगा तसेच काँग्रेस नेते मोहम्मद नालापद आणि ज्येष्ठ काँग्रेस आमदार एन.ए. हरिस यांचा मुलगा देखील असल्याचे समोर आले. राजकीय घराण्यांतील वारसदारांचा सहभाग समोर आल्यानंतर ही घटना राजकीयदृष्ट्याही संवेदनशील बनली आहे.
आर्यन खानविरुद्ध तक्रार
या व्हिडिओनंतर एका वकिलाने आर्यन खानविरुद्ध अधिकृत तक्रार दाखल केली असून त्याच्यावर सार्वजनिक ठिकाणी अश्लील वर्तनाचा आरोप करण्यात आला आहे. घटनेची माहिती मिळताच बेंगळुरू पोलिसांनी त्या पबमध्ये भेट देत तपास सुरू केला. पोलिसांनी आर्यनच्या मॅनेजरची चौकशी केली असून पब व्यवस्थापनाकडून सीसीटीव्ही फुटेज आणि अन्य माहिती मागवण्यात आली आहे. मात्र, पोलिसांकडून अद्याप कोणतेही अधिकृत विधान देण्यात आलेले नाही.
विशेष म्हणजे आर्यन खान सध्या जामिनावर बाहेर आहे. 3 ऑक्टोबर 2021 रोजी क्रूझ पार्टीवरील एनसीबीच्या कारवाईत त्याला सहा जणांसह अटक झाली होती. त्या प्रकरणात त्याने 25 दिवस तुरुंगात घालवले होते. अनेक वेळा जामीन नाकारल्यानंतर अखेरीस 28 ऑक्टोबर 2021 रोजी त्याला जामीन मंजूर करण्यात आला. त्यानंतर आर्यनने सार्वजनिक ठिकाणी फारशी वादग्रस्त उपस्थिती दाखवलेली नव्हती, मात्र नुकत्याच समोर आलेल्या या घटनेने पूर्वीचे वाद पुन्हा एकदा जागे केले आहेत. सध्या या प्रकरणाचा तपास सुरू आहे आणि व्हिडिओच्या सत्यतेबाबत, त्यामागील परिस्थितीबाबत आणि संबंधित व्यक्तींच्या भूमिकेबाबत चौकशी करण्यात येत आहे. राजकीय व्यक्तींच्या मुलांचा सहभाग असल्याने या प्रकरणाचे पडसाद आणखी दूरवर उमटण्याची शक्यता व्यक्त केली जाते.
