डॉ. अमोल कोल्हे यांची ऐतिहासिक भूमिकांमध्ये खास ओळख आहे. शिवछत्रपती, शंभूराजे, तसेच इतर अनेक दमदार व्यक्तिरेखा साकारत त्यांनी मराठी प्रेक्षकांच्या मनात अढळ स्थान निर्माण केले. आता त्यांच्या अभिनय कारकिर्दीत आणखी एक भव्य आणि विचारप्रवर्तक अध्याय समाविष्ट होत आहे. स्टार प्रवाहच्या नव्या मालिकेत ते महात्मा ज्योतिराव फुलेंची भूमिका साकारणार असून त्यांच्या चाहत्यांसाठी ही निश्चितच उत्सुकता वाढवणारी बातमी आहे.
क्रांतिकारी विचारवंताची भूमिका
‘मी सावित्रीबाई जोतीराव फुले’ या मालिकेद्वारे अमोल कोल्हेंना एका क्रांतिकारी विचारवंताची भूमिका साकारण्याची संधी मिळाली आहे. महात्मा फुले हे समाजप्रबोधनाचा दीप जाळणारे, स्त्रीशिक्षणाचे प्रणेते आणि असमानतेविरुद्ध बंड पुकारणारे विचारसूर्य होते. अशा भूमिकेत उतरण्यासाठी कलाकाराकडून केवळ अभिनय कसोटीच नव्हे, तर विचारांची खोलीही अपेक्षित असते. कोल्हे मात्र हे आव्हान स्वीकारायला सज्ज आहेत.
या भूमिकेविषयी प्रतिक्रिया देताना अमोल कोल्हे म्हणाले की, त्यांच्या कारकिर्दीत अनेक भव्य व्यक्तिरेखा साकारण्याचा योग आला, परंतु महात्मा फुलेंच्या भूमिकेचे दायित्व वेगळ्याच पातळीचं आहे. व्यवस्थेला प्रश्न विचारण्याचे धैर्य आणि समतेची मशाल पेटवून ठेवण्याचा वारसा फुलेंनी जपला. तो आजच्या प्रेक्षकांपर्यंत पोहोचवण्याची जबाबदारी त्यांनी अत्यंत भावनिक पद्धतीने स्वीकारली आहे.
विशेष म्हणजे, जवळपास 17 वर्षांनंतर अमोल कोल्हे पुन्हा स्टार प्रवाहसोबत काम करत आहेत आणि यावेळी फक्त अभिनेता नाही तर निर्माता म्हणूनही त्यांची भूमिका महत्त्वाची आहे. त्यांच्या ‘जगदंब क्रिएशन्स’ या निर्मिती संस्थेनेच या मालिकेची निर्मिती केली आहे. त्यामुळे ही मालिका त्यांच्या दृष्टीने अधिक जिव्हाळ्याची ठरत आहे.
सावित्रीबाईंच्या भूमिकेत कोण
या मालिकेत सावित्रीबाईंच्या भूमिकेत मधुराणी गोखले दिसणार आहेत. कोल्ह्यांच्या मते सावित्रीबाई–जोतीराव यांची जोडी ही भारतीय समाजसुधारणेचा पाया आहे. त्यामुळे सावित्रीबाईंचा संघर्ष आणि जोतीराव यांनी दिलेला बळकट पाठिंबा यांची कहाणी त्यांनी अत्यंत संवेदनशीलतेने उभी करण्याचा मानस व्यक्त केला आहे.
स्टार प्रवाहच्या मते, समाजपरिवर्तनाचा वारसा पुढील पिढीपर्यंत पोहोचवण्याचं दायित्व या मालिकेद्वारे पार पाडता येईल. स्त्री-पुरुष समानता, विधवा पुनर्विवाह, शिक्षणाचा मूलभूत हक्क अशी अनेक सामाजिक क्रांती घडवणाऱ्या जोतीरावांच्या भूमिकेत कोल्हे दिसणार म्हणजे प्रेक्षकांना पुन्हा एकदा विचार करायला लावणारा प्रवास पाहायला मिळणार आहे.
‘मी सावित्रीबाई जोतीराव फुले’ ही नवी मालिका 5 जानेवारीपासून स्टार प्रवाहवर सुरू होत आहे. महात्मा फुलेंच्या जीवनाची भूमिका साकारताना अमोल कोल्हे काय नवं सादर करतात, हे पाहण्यासाठी प्रेक्षक निश्चितच उत्सुक आहेत. त्यांच्या अभिनयाची ही ऐतिहासिक पायरी मराठी मालिकाजगतासाठीही एक महत्त्वाचा टप्पा ठरण्याची चिन्हे दिसत आहेत.
