थायलंडमध्ये सुरु असलेल्या मिस यूनिवर्स 2025 स्पर्धेत मोठी आणि दुर्दैवी घटना घडली असून, जगभरातील सौंदर्यस्पर्धा चाहत्यांचे लक्ष पुन्हा एकदा या कार्यक्रमाकडे वळले आहे. आधीच तीन जजांनी अचानक राजीनामे दिल्यामुळे निर्माण झालेला वाद शांत होत नाही तोच आता स्पर्धेच्या प्राथमिक फेरीत मिस जमैका, डॉ. गॅब्रिएल हेनरी स्टेजवरून पडल्याची धक्कादायक बातमी समोर आली आहे. सौंदर्यस्पर्धांच्या इतिहासात अशा प्रकारच्या घटना अत्यंत दुर्मिळ मानल्या जातात.
नेमकं काय घडलं?
घटना ईव्हनिंग गाउन सेगमेंटदरम्यान घडली. गॅब्रिएल हेनरी स्टेजवर वॉक करत असताना एका क्षणात त्यांचा तोल गेला आणि त्या थेट जमिनीवर कोसळल्या. प्रेक्षक, स्पर्धक आणि क्रू मेंबर्स यांच्या समोर ही घटना घडताच क्षणभरात सभागृहात गोंधळ उडाला. स्पर्धेचे लाइव्ह कव्हरेज पाहणाऱ्यांनाही हा क्षण हादरवून गेला. सोशल मीडियावर या घटनेचे व्हिडिओ वेगाने पसरू लागले आणि हेनरीची प्रकृती कशी आहे, याबाबत जगभरातून चिंता व्यक्त केली जाऊ लागली.
घटनेनंतर आयोजकांनी तातडीने वैद्यकीय पथकाला बोलावले. हेनरीला स्ट्रेचरद्वारे स्टेजवरून बाहेर काढण्यात आले आणि जवळच्या पाओलो रंगसिट रुग्णालयात दाखल करण्यात आले. मिस यूनिवर्स जमैका संस्थेने 19 नोव्हेंबर रोजी त्यांच्या अधिकृत इंस्टाग्राम हँडलवरून माहिती देत सांगितले की प्राथमिक तपासणीनंतर डॉक्टरांनी स्पष्ट केले आहे की हेनरीला जीवघेणी किंवा गंभीर दुखापत झालेली नाही. तथापि, संपूर्णपणे सुरक्षित आणि निरोगी असल्याचे सुनिश्चित करण्यासाठी त्यांना काही वैद्यकीय चाचण्यांतून जाणे आवश्यक आहे.
डॉक्टरांच्या देखरेखी खाली
संस्थेने जारी केलेल्या निवेदनात म्हटले आहे की मिस यूनिवर्स जमैका 2025 म्हणून प्रतिनिधित्व करणाऱ्या डॉ. गॅब्रिएल हेनरी यांना प्राथमिक स्पर्धेतील ईव्हनिंग गाउन राउंड दरम्यान झालेल्या अपघातामुळे रुग्णालयात हलवण्यात आले. डॉक्टर त्यांची काळजीपूर्वक देखभाल करत आहेत आणि प्रथमदर्शनी कोणताही गंभीर धोका नसल्याचे स्पष्ट केले आहे. संस्थेने जगभरातील चाहत्यांना आणि समर्थकांना शांत राहण्याचे आवाहन केले असून, हेनरीच्या लवकर बऱ्या होण्यासाठी सकारात्मक विचार आणि प्रार्थना पाठवण्याची विनंती केली आहे.
या घटनेनंतर सोशल मीडियावर हेनरीसाठी प्रार्थनांचा आणि शुभेच्छांचा वर्षाव होत आहे. अनेक माजी मिस यूनिवर्स विजेत्या, स्पर्धक आणि सौंदर्यस्पर्धेशी संबंधित व्यक्तींनी सार्वजनिकरित्या हेनरीच्या जलद प्रकृती सुधारासाठी संदेश शेअर केले आहेत. स्पर्धा सुरू असली तरी या अपघाताने सुरक्षा व्यवस्था आणि स्टेज मॅनेजमेंटबाबत प्रश्न निर्माण केले आहेत. विशेषतः मोठ्या प्रमाणावर होणाऱ्या आंतरराष्ट्रीय स्पर्धांमध्ये अशा घटना घडू नयेत, यासाठी अधिक काळजी घेण्याची गरज असल्याची मागणीही आता व्यक्त केली जात आहे.
जगभरातील चाहत्यांना हेनरी पुन्हा एकदा स्टेजवर हसतमुख दिसावी, तिचा आत्मविश्वास कायम राहावा आणि तिचा प्रवास सुरक्षित व्हावा, अशी अपेक्षा आहे. मिस यूनिवर्स 2025 फाइनलपूर्वी घडलेली ही घटना स्पर्धेच्या इतिहासातील एक मोठा धक्का म्हणून नोंदली जाईल, पण त्याच वेळी गॅब्रिएल हेनरीच्या लढाऊ वृत्तीवर सर्वांचेच लक्ष केंद्रीत राहणार आहे.