‘बिग बॉस 19’च्या घरात सध्या फॅमिली वीक सुरू असून या आठवड्याने स्पर्धकांच्या भावनांना अक्षरशः उधाण आले आहे. अनेक आठवड्यांच्या तणावपूर्ण वातावरणानंतर कुटुंबातील सदस्यांना प्रत्यक्ष भेटण्याची संधी मिळताच घरात आनंदाची, समाधानाची आणि आपुलकीची लाट पसरली आहे. नेहमी भांडणे, चर्चा आणि स्ट्रॅटेजीमध्ये हरवलेले स्पर्धक अचानक घरच्या माणसांसमोर आल्यावर छोट्या मुलांसारखे भावुक झाले. एकमेकांविषयीचा नूरही बदलला आणि घर काही काळासाठी जणू घरासारखेच वाटू लागले.
या फॅमिली वीकमध्ये अनेक स्पर्धकांचे नातेवाईक भेटायला आल्याने घरातील प्रत्येक कोपरा भावनांनी भरून गेला. गौरव खन्ना यांच्या पत्नी अश्रुव कौरने पतीला पाहताच अश्रू ढाळले, तर कुनिका सदानंद यांची नात घरात आल्यानंतर तिनेही आपल्या आजीला भेटून भावूक केले. अशा अनेक भेटींनी प्रेक्षकांच्याही डोळ्यात पाणी आणले. मात्र या सर्वांमध्ये सर्वाधिक लक्ष वेधून घेतले ते स्पर्धक प्रणीत मोरेने केलेल्या साध्या पण प्रभावी कृतीने.
प्रणितने जोडले दोन्ही हात
अशनूर कौरचे वडील जेव्हा बिग बॉसच्या घरात प्रवेशले तेव्हा त्यांनी आधी आपल्या मुलीला घट्ट मिठी मारत तिची खबरबात विचारली. त्यानंतर त्यांनी घरातील इतर सदस्यांना एकामागून एक भेटायला सुरुवात केली. प्रत्येकाने त्यांचे आदराने स्वागत केले, पण प्रणीत मोरे समोर आला तशी घडलेली घटना चाहत्यांच्या नजरेत भरून राहिली. प्रणीतने तत्परतेने पुढे येत दोन्ही हात जोडून पारंपरिक मराठी पद्धतीने त्यांना नमस्कार केला आणि त्यानंतर आदराने त्यांना मिठी मारली. या विनयशील आणि संस्कारी स्वागताने अशनूरचे वडील अचंबित झालेच, पण घरातील इतर स्पर्धकही या कृतीने भारावले.
हा प्रसंग कॅमेऱ्यात कैद झाला आणि काही वेळातच सोशल मीडियावर व्हायरल झाला. एका युजरने हा व्हिडिओ शेअर करत लिहिले की, “माणूस कितीही मोठा झाला तरी त्याचे संस्कार त्याला उंच नेतात.” या एका वाक्याने लाखो प्रेक्षकांच्या भावना व्यक्त झाल्या. अनेकांनी प्रणीतचे कौतुक करत त्याच्या मराठी संस्कारांची स्तुती केली. काहींनी तर प्रणीत मोरेच या सीझनचा विजेता ठरेल, अशीही भविष्यवाणी केली. चाहत्यांमध्ये त्याचे प्रचंड फॅनबेस आधीच आहेच, पण या कृतीनंतर त्याची लोकप्रियता आणखी वाढताना दिसत आहे. फॅमिली वीकमधील या भावनिक क्षणांमुळे केवळ स्पर्धकांनाच नाही तर प्रेक्षकांनाही घरच्या लोकांचे महत्त्व जाणवल्याची भावना व्यक्त होत आहे. बिग बॉसचे घर कधी कठोर तर कधी भावनिक क्षणांनी भरलेले असते, पण अशा प्रसंगांनी ते घर अधिक मानवी आणि आपुलकीचे वाटते.
बिग बॉस अंतिम टप्प्यात
दरम्यान, बिग बॉस 19 आता अंतिम टप्प्यात पोहोचला असून फिनाले 7 डिसेंबर 2025 रोजी रविवारी होणार असल्याची माहिती समोर आली आहे. सध्या घरात प्रणीत मोरे, अशनूर कौर, शाहबाज बदेशा, गौरव खन्ना, अमाल मलिक, तान्या मित्तल, कुनिका सदानंद आणि वाइल्ड कार्ड एन्ट्री मिळालेली मालती चहर हे स्पर्धक आहेत. पुढील काही दिवसांत घरात आणखी ट्विस्ट्स दिसतील आणि या हंगामाचा विजेता पुढील महिन्यात जाहीर होईल. प्रणीत मोरेच्या संस्कारपूर्ण कृतीने पुन्हा एकदा सिद्ध झाले की स्पर्धेच्या वातावरणातही नम्रता आणि संस्कार हेच व्यक्तिमत्त्व उंचावतात.