पुणे महानगर परिवहन महामंडळ सार्वजनिक वाहतूक सेवा सुधारण्यासाठी महत्त्वपूर्ण पाऊल उचलत आहे. जून 2025 पर्यंत, PMPML आपल्या ताफ्यात 200 नव्या बसांचा समावेश करण्याची योजना आखत आहे. या बस PMPML च्या मालकीच्या असतील, अशी माहिती आहे. यामुळे पुणेकरांना आरामदायी प्रवास करता येणे शक्य होणार आहे.
पुणेकरांचा प्रवास सोपा होणार
नवीन बसांमुळे दररोज सुमारे लाखभर अथवा त्याहून अधिक प्रवाशांना सेवा मिळू शकेल, ज्यामुळे सध्याच्या गर्दीला आणि उभ्या प्रवाशांच्या संख्येला कमी करण्यास मदत होईल. ज्यामुळे प्रवाशांना आरामदायक आणि पर्यावरणपूरक प्रवास अनुभवता येईल. कारण जुनी बसांची सेवा कालबाह्य झाली आहे आणि प्रवाशांच्या वाढत्या मागणीला तोंड देण्यासाठी नवीन बसांची आवश्यकता आहे. जवळपास 236 बसेस स्क्रॅपमध्ये जाणार आहेत. या निर्णयामुळे पुणे महानगर प्रदेश विकास प्राधिकरण (PMRDA) क्षेत्रातील प्रवाशांना सुरक्षित, आरामदायक आणि पर्यावरणपूरक सार्वजनिक वाहतूक सेवा मिळण्याची अपेक्षा आहे.
पुणेकरांचं पीएमपीचं अनोख नातं
पुणेकर नागरिक आणि PMPML (पुणे महानगर परिवहन महामंडळ) यांचं नातं खूप जुने आणि महत्वाचं आहे. PMPML ही सर्वसामान्य पुणेकरांची दैनंदिन जीवनरेषा बनली आहे. शालेय विद्यार्थी, नोकरदार, वयोवृद्ध, महिला अशा विविध घटकांना PMP बससोयीची, किफायतशीर आणि पर्यावरणपूरक वाहतूक सेवा पुरवते. जरी कधी-कधी वेळापत्रकात विलंब वा बसेसची कमतरता भासते, तरीही ही सेवा पुणेकरांच्या रोजच्या प्रवासाचा अविभाज्य भाग आहे. PMPML च्या नव्या बसांचा समावेश, सेवा सुधारणा व डिजिटल तिकीट व्यवस्था यामुळे नागरिकांचा विश्वास अधिक दृढ होत आहे. हे नातं फक्त प्रवासापुरतं मर्यादित नसून, शहराच्या विकासाचीही शिदोरी आहे.
