काल रात्री उशिरा मोठी आणि धक्कादायक अशी बातमी तामिळनाडूच्या करूरमधून समोर आली. तामिळनाडूतील करूर येथे अभिनेता आणि टीव्हीके प्रमुख विजय यांची रॅली होती. गर्दी इतकी मोठी झाली की चेंगराचेंगरीसारखी परिस्थिती निर्माण झाली. आतापर्यंत 39 जणांचा मृत्यू झाल्याचे वृत्त आहे. हा आकडा आणखी वाढण्याची भीती व्यक्त केली जात आहे. यावेळी झालेल्या प्रचंड गर्दीत काही लोकांचा श्वास गुदमरल्याने मृत्यू झाल्याचे सांगण्यात येत आहे. परंतु, 600 कोटींची ऑन रेकॉर्ड संपत्ती असणारा थालापती विजय नेमका एका पक्षाचा प्रमुख आणि राजकीय नेता कसा झाला? त्याबद्दल जाणून घेऊ…
सुपरस्टार विजयची संपत्ती नेमकी किती ?
दक्षिणेकडील सिनेसृष्टीतील सुपरस्टार आणि ‘तमिळगा वेट्री कळघम’ TVK या राजकीय पक्षाचे अध्यक्ष थलापती विजय सध्या एका मोठ्या आणि हृदयद्रावक घटनेमुळे चर्चेत आले आहेत. आज, शनिवार रोजी तामिळनाडूतील करूर येथे आयोजित केलेल्या त्यांच्या एका जाहीर सभेदरम्यान चेंगराचेंगरीसदृश परिस्थिती निर्माण झाली. प्रचंड गर्दी आणि उष्णतेमुळे झालेल्या गोंधळात 39 जणांचा दुर्दैवी मृत्यू झाल्याची माहिती रुग्णालय प्रशासनाने दिली आहे.
दरम्यान, अशातच दक्षिणेकडील या सुपरस्टारच्या अफाट संपत्तीची चर्चाही होत आहे. विजयची एकूण संपत्ती ६०० कोटी असल्याचा अंदाज आहे. चेन्नईतील नीलनकराई येथे कॅसुरीना ड्राईव्हवर विजयचा एक आलिशान बंगला आहे. हॉलीवूड अभिनेता टॉम क्रूझच्या बीच हाऊसपासून प्रेरणा घेऊन हा बंगला डिझाइन करण्यात आला आहे, जो बंगालच्या उपसागराकडे तोंड करून उभा आहे.
‘बीस्ट’ या चित्रपटासाठी विजयने १०० कोटी मानधन घेतल्याची माहिती आहे, जे सुपरस्टार रजनीकांतच्याही मानधनापेक्षा जास्त होतं. जाहिराती आणि चित्रपटांच्या माध्यमातून त्याची वार्षिक कमाई १०० ते १२० कोटींच्या घरात आहे. विजयकडे Rolls Royce Ghost २.५ कोटी, BMW X5 आणि X6, Audi A8 L, Range Rover Evoque ६५ लाख यांसारख्या अनेक महागड्या गाड्यांचं कलेक्शन आहे.
सुपरस्टार विजय कसा बनला राजकीय नेता?
दाक्षिणात्य सिनेसृष्टीतील सुपरस्टार थलापती विजय यांचे राजकारण आणि जनमानसातील स्थान गेल्या काही वर्षांत लक्षणीयरीत्या वाढले आहे. २ फेब्रुवारी २०२४ रोजी त्यांनी ‘तमिळगा वेट्री कझगम’ (TVK) या नवीन राजकीय पक्षाची अधिकृत घोषणा केली. यापूर्वीच २००९ मध्ये, विजयने आपल्या चाहत्यांना एकत्र आणण्यासाठी ‘विजय मक्कल इयक्कम’ नावाचा एक मोठा फॅन क्लब सुरू केला होता. या संघटनेने पहिल्यांदा २०११ च्या विधानसभा निवडणुकीत अण्णाद्रमुक युतीला जाहीरपणे पाठिंबा दिला. मात्र, या संघटनेच्या राजकीय ताकदीची खरी झलक ऑक्टोबर २०२१ मध्ये झालेल्या तामिळनाडूतील स्थानिक स्वराज्य संस्थांच्या निवडणुकीत दिसली. या निवडणुकीत ‘विजय मक्कल इयक्कम’ने एकूण १६९ जागांवर उमेदवार उभे केले आणि त्यापैकी तब्बल ११५ जागांवर विजय मिळवत, राज्याच्या राजकारणात आपली मजबूत पकड सिद्ध केली. हाच मोठा जनाधार आणि संघटनशक्ती आता त्यांच्या नव्या राजकीय पक्षाच्या उभारणीसाठी आधार ठरली आहे.
