मंत्री पंकजा मुंडे यांचे स्वीय सहाय्यक अनंत गर्जे यांच्या पत्नी डॉक्टर गौरी पालवे-गर्जे यांनी आत्महत्या केली. यावर्षी फेब्रुवारी महिन्यातच दोघांचे लग्न झाले होते. या लग्नाला पंकजा मुंडे त्यांच्या संपूर्ण कुटुंबासोबत उपस्थित होत्या. आज सकाळपासून माध्यमांनी पंकजा मुंडे यांच्या स्वीय सहाय्यकावर गंभीर आरोप अशा बातम्या चालविल्याने त्यांनी रविवारी दुपारी प्रसिद्धीपत्रक काढून घटनेवर शोक व्यक्त केला. यानिमित्ताने या घटनेबाबत मंत्री पंकजा मुंडेंची पहिली प्रतिक्रिया समोर आली आहे. त्या नेमकं काय म्हणाल्या, जाणून घेऊ…
घटनेनंतर पंकजा मुंडे म्हणाल्या की…
“दिनांक 22 नोव्हेंबर 2025 रोजी संध्याकाळी साडे सहा ते पावणे सातच्या सुमारास माझा पीए अनंतचा फोन माझ्या दुसऱ्या पीएच्या फोनवर आला. तो खूप रडत होता. पत्नीने आत्महत्या केल्याचे अत्यंत आक्रोशाने त्याने मला सांगितले. ही गोष्ट माझ्यासाठी ही खूप धक्कादायक होती. पोलिसांच्या कुठल्याही कारवाईमध्ये कसूर राहू नये आणि त्यांनी योग्य तपास करून या विषयाला हाताळावे असे माझे म्हणणे आहे, तसे मी पोलिसांना देखील सांगितले आहे. गौरीच्या वडिलांशीही मी बोलले, ते प्रचंड दु:खात आहेत हे मी समजू शकते. अश्या घटना जीवाला चटका लावून जातात आणि मनाला सुन्न करतात. कोणाच्या अति वैयक्तिक जीवनात काय चालू असतं हे अनाकलनीय आहे. अचानक धक्कादायक अशी ही घटना घडली असल्याने मलाही अस्वस्थ वाटत आहे, असे पंकजा मुंडे प्रसिद्धीपत्रकाद्वारे म्हणाल्या.
अनंत गर्जेसह तीन जणांवर गुन्हा
पंकजा मुंडे यांचा पीए अनंत गर्जच्या पत्नी, डॉक्डर गौरी पालवे-गर्जे यांनी मानसिक तणावात येऊन टोकाचे पाऊल उचलले. त्यांनी मुंबईतील राहत्या घरात आत्महत्या केली. अनंत गर्जे यांचे एका महिलेशी अनैतिक संबंध असल्याचा दावा गौरी यांनी केला होता. त्यामुळे गेल्या काही दिवसांपासून गौरी आणि अनंत यांच्यामध्ये सतत भांडणे होत होती. अखेर या सगळ्याला कंटाळून गौरीने काल स्वत:ला संपवले. आता या प्रकरणी तिघांवर गुन्हा दाखल करण्यात आला आहे. गौरीच्या आत्महत्येनंतर तिच्या वडिलांनी वरळी पोलीस ठाण्यात तक्रार दाखल केली होती.
समोर येणाऱ्या माहितीनुसार, पंकजा मुंडे अनंत गर्जे याला मुलासारख्या मानायच्या. अनंत गर्जे हे गेल्या काही वर्षांपासून पंकजा मुंडे यांचे स्वीय सहाय्यक म्हणून काम करत. गर्जे यांच्या पत्नी मुंबईतील केईएम रूग्णालयात काम करायच्या. आपल्या पतीचे दुसऱ्या मुलीबरोबर संबंध असल्याच्या संशय त्यांना होता. तसेच त्यासंबंधीचे काही पुरावे देखील त्यांच्या हाताला लागले होते. त्यामुळे नैराश्यातून त्यांनी आत्महत्या केल्याचे सांगण्यात येते.