मुसळधार पावसानंतर मुंबईत डेंग्यू आणि मलेरियाचे प्रमाण वाढण्याची शक्यता असते. पावसामुळे शहरात ठिकठिकाणी पाणी साचते आणि डासांच्या प्रजननासाठी अनुकूल वातावरण तयार होते. विशेषतः एडीस डास डेंग्यूचा तर अॅनोफिलीस डास मलेरियाचा प्रसार करतात. पाणी साचलेल्या जागा, नाले, गटारे आणि उघडी भांडी ही डासांची मुख्य उत्पत्तीस्थाने ठरतात. त्या पार्श्वभूमीवर बीएमसी आणि आरोग्य विभाग आता सतर्क झाला आहे. मुंबईत पावसामुळे परिस्थिती बिकट झाली आहे. मॉन्सूनमुळे लोकांची समस्या वाढली असून, पावसामुळे आणि पाणी साचल्यामुळे शहरात डेंग्यू, मलेरिया, टायफॉईड यांसारखे हंगामी आजार पसरण्याची भीती बीएमसीला आहे. यामुळे नागरिकांना या आजारांपासून वाचवण्यासाठी बीएमसीने रस्त्यांपासून हॉस्पिटलपर्यंत व्यापक तयारीसह मोहीम सुरू केली आहे.
जनजागृती आणि उपाययोजना सुरू
मॉन्सून तुलनेने शांत झाला आहे. मात्र, बुडालेले भाग आणि साचलेले पाणी डेंग्यू, मलेरिया यांसारख्या आजारांसाठी कारणीभूत ठरत आहेत. येत्या दिवसांत लेप्टोस्पायरोसिस सारख्या गंभीर आजारांचा धोका वाढतोय. त्यामुळे बीएमसीने झोपडपट्ट्यांमध्ये फोगिंग, सॅनिटायझेशन आणि घराघरांमध्ये औषध वितरणाची मोहीम युद्धस्तरीय सुरू केली आहे. मुंबईत डेंग्यू, मलेरिया, टायफॉईड यांसारख्या आजारांचे रुग्ण वाढतात. गेल्या पावसामुळे रुग्णसंख्या अचानक वाढल्याने बीएमसीच्या रुग्णालयांमध्ये मानसून वॉर्ड्स उभारण्यात आले आहेत.
