दिवाळी म्हटलं की सगळ्यांना सर्वात पहिले आठवतात ते फटाके.. फुलबाजी, भुईचक्र, अनार, लवंगी, सुतळीबॉम्ब असे अनेक फटाके सर्वजण आनंदाने फोडतात. मात्र फटाक्यांमुळे होणारे प्रदूषण लक्षात घेत मुंबई पोलिसांनी यंदा कडक नियमावली बनविली आहे, त्यासाठी पोलिसांनी चांगलाच प्लॅन आखला आहे. त्यानुसार कारवाईचा धडाका देखील पोलिसांनी खरंतर लावला आहे.
मुंबईत फटाके विक्रेत्यांवर कारवाई
मुंबईमध्ये बीएमसीने बेकायदेशीर फटाक्यांवर कारवाई केली. ९४३ किलोहून अधिक फटाके जप्त करून नष्ट करण्यात आले. बीएमसीने नागरिकांना कमी प्रदूषण करणाऱ्या फटाक्यांचा वापर करण्याचे आवाहन केले आहे. मिळालेल्या माहितीनुसार चार दिवसांच्या मोहिमेत, बीएमसीच्या परवाना विभागाने रस्त्याच्या कडेला असलेल्या बेकायदेशीर स्टॉलवरून ९४३ किलोहून अधिक फटाके जप्त केले, ज्यामध्ये अंधेरी पश्चिम, डोंगरी, चेंबूर आणि कुर्ला सारख्या भागात मोठ्या प्रमाणात जप्त केले गेले.
दिवाळी सणाच्या वेळी बेकायदेशीर फटाक्यांच्या विक्रीला आळा घालण्यासाठी बीएमसी आपले प्रयत्न तीव्र करत आहे. बीएमसी अधिकाऱ्यांनी नागरिकांना हवा आणि ध्वनी प्रदूषण कमी करण्यासाठी कमी प्रदूषण करणाऱ्या फटाक्यांची निवड करण्याचे आवाहन केले आहे. नियमांना न जुमानता, मुंबईतील विविध भागात रस्त्यांवर आणि पदपथांवर बेकायदेशीर फटाक्यांची दुकाने सुरू असल्याचे आढळून आले आहे. परवाना विभागाच्या वॉर्ड-स्तरीय पथके वैध परवान्याशिवाय विक्री करणाऱ्या किंवा जास्त प्रमाणात फटाके साठवणाऱ्या विक्रेत्यांची चौकशी करत आहे.
फटाक्यांमुळे होणारे प्रदूषण
फटांक्यांमुळे होणारे मोठे प्रदूषण ही दिवाळीच्या सणासोबत येणारी गंभीर समस्या आहे. फटाके फोडल्याने हवेत धूळ, धूर, ध्वनी आणि रासायनिक पदार्थ मोठ्या प्रमाणावर वाढतात, ज्यामुळे वायू प्रदूषण प्रचंड वाढते. यामुळे श्वसनाच्या आजारांचा धोका, हृदयविकाराचा धोका आणि लहान मुलांमध्ये श्वसनाचे त्रास वाढतात. ध्वनी प्रदूषणामुळे मानसिक ताण, प्राणी आणि पक्ष्यांवर परिणाम होतो. तसेच, वातावरणात झाकलेला PM2.5 आणि PM10 कणांचा स्तर वाढतो, ज्यामुळे प्रदूषणाचा स्तर दुप्पट किंवा तिप्पट होतो. या कारणांमुळे सल्ला दिला जातो की फटाके मर्यादित प्रमाणात वापरावेत किंवा पर्यावरणपूरक फटाके वापरले जावेत.
