कोपरगाव तालुक्यातील मोहनीराजनगर भागात 24 सप्टेंबरच्या रात्री दोन गटामध्ये तूफान हाणामारी आणि दगडफेक झाली असल्याची माहिती समोर आली आहे. सध्या या प्रकरणात पोलिसांनी मोठी कारवाई करत आतापर्यंत 63 जणांविरोधात गुन्हा दाखल केला आहे. तर आतापर्यंत 16 जणांना अटक करण्यात आली आहे.
कोपरगावात रात्रीच्या अंधारात काय घडलं?
दांडीया दरम्यान अहिल्यानगर जिल्ह्यातील कोपरगावमध्ये बुधवारी रात्री दोन गटात जोरदार राडा झाला. यावेळी तुंबळ हाणामारी पाहायला मिळाली. त्यात कमी म्हणून की काय यानंतर जोरदार दगडफेक ही झाली आहे. या घटनेमुळे परिसरासह शहरात तणावाचे वातावरण निर्माण झाले. संतप्त जमावाने पोलिसांच्या वाहनावरही दगडफेक केल्याचे आता समोर आले आहे. त्यानंतर मोठा पोलीस फौजफाटा शहरात दाखल झाला आहे. त्यानंतर आता परिस्थिती नियंत्रणात आली असल्याचं पोलिसांकडून सांगण्यात आले आहे.
गरबा सुरू असताना तिथून एक वाहन जात होते. त्याचा धक्का गरबा खेळणाऱ्या एका व्यक्तीला लागला. या शुल्लक कारणावरून हा राडा झाला. विशेष म्हणजे हे दोन्ही लोक वेगवेगळ्या राजकीय पक्षांशी संबंधीत होते. त्यामुळे धक्का लागल्याच्या किरकोळ गोष्टीचा मोठा बावू करण्यात आला. कार्यकर्ते जमले. तिथेचनंतर जोरदार राडा झाला. हाणामारी झाली. दगडफेकही झाली. त्यात पोलीस ही जखमी झाल्याचं समोर येत आहे. या राड्या प्रकरणी जवळपास 63 जणां विरोधात गुन्हा दाखल करण्यात आला आहे.
पोलिसांवरही दगडफेक; 2 पोलीस जखमी
किरकोळ कारणावरुन झालेल्या वादानंतर जमावाने पोलिसांच्या गाडीवर दगडफेक केली. या दगडफेकीत 2 पोलीस आणि काही नागरिक जखमी झाले असून त्यांच्यावर उपचार सुरु आहे. या प्रकरणाची माहिती मिळताच पोलीस घटनास्थळी दाखल झाले होते मात्र पोलिसांची संख्या कमी असल्याने जमावाने पोलिसांच्या गाडीवर दगडफेक केली असल्याची माहिती समोर आली आहे. सध्या घटनास्थळी पोलिसांचा मोठा फौजफाटा तैनात करण्यात आला आहे.
या प्रकरणात पोलिसांनी आमदार आशुतोष काळे यांचे स्विय सहाय्यक, मनसे शहरप्रमुख आणि शिवसेनेच्या माजी नगरसेवकावर गुन्हा दाखल केला आहे. त्यामुळे या घटनेचे काही राजकीय लागेबांधे असल्याची बाब देखील समोर आली आहे. त्यामुळे परिसरात सध्या पोलिसांचा बंदोबस्त असून अधिक तपास सुरू आहे.
