मुंबईतून अपघाताची एक धक्कादायक बातमी समोर येत आहे. मुंबईच्या कोस्टल रोडवरून (Coastal Road Car Accident) एर्टिगा कार थेट समुद्रात गेली. सुदैवाने या अपघातात कोणतीही जीवितहानी झाली नाही. गस्तीवरील महाराष्ट्र सुरक्षा बलाच्या जवानांनी सतर्कता दाखवत चालकाचे प्राण वाचवले. फ्रशोगर दरायुश बत्तीवाला 28 असे या तरुणाचे नाव असून वरळी पोलिसांनी त्याला ताब्यात घेतले आहे.
नेमकं काय घडलं?? Coastal Road Car Accident
याबाबत अधिक माहिती अशी की, सदर चालक हा महालक्ष्मीहून वरळीच्या दिशेने जात होता. चालक अतिशय वेगाने गाडी चालवत होता. याच दरम्यान कोस्टल रोडवर त्याच्या गाडीचे नियंत्रण सुटले. अतिशय वेगवान असलेल्या या कारने डिवायडरला धडक दिली. गाडीचा वेग इतका जास्त होता की, डिवायडर तुटले आणि तब्बल 30 फूट उंचीवरून कार थेट समुद्रात गेली. Coastal Road Car Accident
गाडीने गाठला समुद्राचा तळ
या अपघातात फ्रशोगर किरकोळ जखमी झाला असून त्याला उपचारासाठी पोलिसांनी जवळील शासकीय रुग्णालयात दाखल करण्यात आल्याची माहिती पोलिसांनी दिली. 30 फूटावरून पाण्यात पडलेल्या गाडीने काही क्षणात तळ गाठल्याने गाडी अजूनही समुद्रातच आहे. कार चालकाने मद्यप्राशन केले असण्याची शक्यता पोलिसांनी वर्तवली असून अधिक तपास वरळी पोलिस करत आहेत.
यापूर्वी, वरळी सी-लिंकवर 9 सप्टेंबर 2025 रोजी एक भीषण अपघात झाला होता. या अपघातात एका पोलीस हवालदाराचा जागीच मृत्यू झाला. सागरी किनारा मार्ग (Coastal Road) आणि वरळी सी-लिंकच्या कनेक्टिंग पॉईंटजवळ हा अपघात झाला होता. काही पोलीस कर्मचारी व्हीआयपी बंदोबस्तासाठी तैनात होते.