महाराष्ट्रातील कोकण आणि दक्षिण-मध्य महाराष्ट्राच्या काही भागात आज मुसळधार पावसाची शक्यता; हवामान विभागाने अंदाज वर्तवला!

पश्चिम महाराष्ट्रातील कोल्हापूर व त्याच्या घाटमाथ्यावर जोरदार ते मुसळधार पावसाचा अंदाज व्यक्त करण्यात आला आहे. पुणे, सातारा, सांगली आणि सोलापूर जिल्ह्यांमध्ये मेघगर्जनेसह विजांचा कडकडाट होण्याची शक्यता असून, ताशी 30 ते 40 किमी वेगाने वारे वाहण्याची शक्यता वर्तवण्यात आली आहे. या पार्श्वभूमीवर हवामान खात्याने पश्चिम महाराष्ट्रातील सर्व जिल्ह्यांसाठी यलो अलर्ट घोषित केला आहे. उत्तर महाराष्ट्रातील नाशिक आणि अहिल्यानगर जिल्ह्यांसाठी हवामान विभागाकडून यलो अलर्टचा इशारा देण्यात आला आहे. तर धुळे, नंदुरबार आणि जळगाव या भागांमध्ये काही ठिकाणी हलक्या ते मध्यम स्वरूपाच्या सरी कोसळण्याची शक्यता व्यक्त करण्यात आली आहे.

मराठवाड्यातील सर्व आठ जिल्ह्यांसाठी हवामान विभागाने यलो अलर्ट जाहीर केला आहे. छत्रपती संभाजीनगर, जालना, परभणी, हिंगोली, लातूर, नांदेड आणि धाराशिव या भागांमध्ये वीज चमकल्यासह जोरदार सरी कोसळण्याची शक्यता आहे. तर बीड जिल्ह्यात काही निवडक ठिकाणी मुसळधार पावसाचा अंदाज व्यक्त करण्यात आला आहे. विदर्भातील वर्धा, नागपूर, चंद्रपूर, भंडारा, गोंदिया आणि गडचिरोली या सहा जिल्ह्यांसाठी हवामान विभागाने यलो अलर्ट घोषित केला आहे. पश्चिम विदर्भात आकाश प्रामुख्याने ढगाळ राहण्याची शक्यता असून, काही निवडक भागांत किरकोळ पावसाच्या सरींचा अंदाज वर्तवण्यात आला आहे. त्यामुळे एकंदरीत कमी-अधिक फरकाने राज्याच्या सर्वच भागात चांगल्या पावसाचा अंदाज आहे.