मुंबई-पुणे या दोन शहरांदरम्यान प्रवास करणाऱ्या नागरिकांसाठी एक महत्वाची बातमी समोर येत आहे. त्यानुसार, मुंबई-पुणे द्रुतगती महामार्गावरील प्रवास आणखी वेगवान आणि सुकर होणार आहे. सध्या सहा पदरी असलेला हा महामार्ग आता थेट दहा पदरी करण्याचा निर्णय घेण्यात आला आहे. महाराष्ट्र राज्य रस्ते विकास महामंडळाकडून तयार करण्यात आलेल्या नव्या प्रस्तावानुसार, या प्रकल्पासाठी अंदाजे 14 हजार कोटी रुपयांचा खर्च अपेक्षित आहे. हा प्रस्ताव येत्या दहा दिवसांत राज्य सरकारकडे मंजुरीसाठी पाठवला जाणार आहे. राज्य सरकारने या प्रस्तावाला हिरवा कंदिल दाखवल्यास या महामार्गाचे काम लवकरच सुरू होण्याची शक्यता आहे.
जवळपास 1 लाख वाहनांची ये-जा
याआधी एमएसआरडीसीने महामार्गाचे आठ पदरीकरण करण्याचा प्रस्ताव फेब्रुवारी 2024 मध्ये सादर केला होता, मात्र आता वाहतूक वाढीचा अंदाज घेत, दोन-दोन मार्गिका वाढवून दहा पदरीकरण करण्याचा निर्णय घेण्यात आला आहे, अशी माहिती एमएसआरडीसीचे व्यवस्थापकीय संचालक अनिलकुमार गायकवाड यांनी एका वृत्तपत्राशी बोलताना दिली. सध्या या महामार्गावरून दररोज सुमारे 65 हजार वाहने धावतात, तर गर्दीच्या वेळेत ही संख्या एक लाखांवर पोहोचते. वाहनांची वाढती संख्या लक्षात घेता, सध्या अस्तित्वात असलेला सहा पदरी रस्ता अपुरा पडू लागला आहे.अ
