नाशिकमध्ये महापालिकेकडून गणेश विसर्जनाच्या संदर्भात विशेष असे नियोजन करण्यात आले आहे. श्री गणरायाला पाचव्या, सातव्या आणि दहाव्या दिवशी निरोप दिला जाणार आहे. गणेश विसर्जनामुळे पर्यावरणाला हानी पोहोचू नये, यासाठी महापालिकेडून विसर्जनासाठी २८ नैसर्गिक, तर ४९ कृत्रिम तळे निर्माण केली आहेत. घरगुती आणि सार्वजनिक गणेश मंडळांना विसर्जनासाठी महापालिकेकडून यादी जाहीर केली आहे. विसर्जन करताना ‘पीओपी’ मूर्ती नदीपात्रात विसर्जित न करता दान करण्याचे आवाहन महापालिकेच्या वतीने करण्यात आले आहे. त्यामुळे या नियोजनाबाबत सविस्तर जाणून घेऊ…
गणेश विसर्जनासाठी पालिकेचे विशेष नियोजन
शहरात नागरिकांकडून पाचव्या, सातव्या आणि दहाव्या दिवशी विसर्जन केले जाते. महापालिकेच्या वतीने यंदा ‘मिशन विघ्नहर्ता’ संकल्पना राबविली जात असून, पर्यावरणपूरक गणेशउत्सव साजरा करण्याचे आवाहन आहे. गोदावरी, नंदिनी नदीपात्रात ‘पीओपी’ गणेशमूर्तींचे विसर्जन केल्यास नदीप्रदूषण होऊन पर्यावरणालाही धोका निर्माण होतो. त्यामुळे विसर्जनाच्या दिवशी ‘पीओपी’ मूर्तींचे नदीपात्रात विसर्जन न करता घरी मूर्तीचे विसर्जन व विघटन होण्यासाठी अमोनियम कार्बोनेट पावडरचे वाटप सुरू आहे.
प्रमुख विसर्जन स्थळांची यादी खालीलप्रमाणे
दरवर्षीप्रमाणे यंदाही पर्यावरणपूरक गणेश विसर्जन करण्यासाठी नागरिकांना तसेच मंडळांना घरातच गणेशमूर्ती विसर्जनाचे आवाहन करण्यात आले आहे. ‘पीओपी’च्या गणेशमूर्तीचे विसर्जन घरातच करण्यासाठी अमोनियम बायोकार्बोनेट सहा विभागांत मोफत उपलब्ध करून देण्यात आले आहे.
सिडको : गोविंदनगर जिजाऊ वाचनालय, राजे छत्रपती व्यायामशाळेजवळ, जुने सिडको, पवननगर, जुलकुंभ सिडको, राजे संभाजी स्टेडियम, सिंहस्थनगर, मीनाताई ठाकरे शाळा, कामटवाडे, डे-केअर शाळा रामनगर, राजीवनगर
पंचवटी : राजमाता मंगल कार्यालय, गोरक्षनगर, आरटीओ कॉर्नर, म्हसरूळ सिता सरोवर, आडगाव पाझर तलाव, नांदूर-मानूर, कोणार्कनगर, तपोवन कपिला संगम, प्रमोद महाजन गार्डन, सरस्वती नगर, रामवाडी चिंचबन, कमलनगर, रोकडोबा सांडवा ते गौरी पटांगण
नाशिक रोड : महापालिका शाळा क्र.१२५ मुक्तिधाम, शासकीय तंत्रज्ञान सामनगाव रोड, शिखरेवाडी मैदान, मनपा नर्सरी जयभवानी रोड, महापालिका क्रीडांगण चेहडी पंपिंग श्रमिकनगर, पुणे रोड, नारायणबापू नगर चौक, जेलरोड, राजराजेश्वरी चौक, गाडेकर मळा देवळालीगाव, के. एन. केला विद्यालय
सातपूर : पाइपलाइन रोड, धर्माजी कॉलनी, शिवाजीनगर, सूर्यामर्फी चौक, अशोकनगर पोलिस चौक, नंदिनी नदी, नासर्डीपूल, अंबड-लिंकरोड, आयटीआय पूल, सातपूर, कोरडेनगर, गंगापूर गाव एसटीपी
