शतकातील सर्वात शक्तिशाली चक्रीवादळांपैकी एक असलेल्या मेलिसा वादळाने क्युबा, हैती आणि जमैकामध्ये कहर केला आहे. ज्यामध्ये डझनभर लोकांचा मृत्यू झाला आहे आणि हजारो बेघर झाले आहेत. गेल्या शतकातील सर्वाधिक शक्तिशाली आणि विध्वंसक चक्रीवादळ म्हणून या वादळाकडे पाहिले जात आहे. त्यामुळे यामधील नुकसानीचा आणि मृतांचा आकडा आणखी वाढण्याची शक्यता व्यक्त केली जात आहे.
मेलिसा चक्रीवादळाचा कहर
शतकातील सर्वात शक्तिशाली चक्रीवादळांपैकी एक, “मेलिसा” ने क्युबा, हैती आणि जमैकामध्ये कहर केला आहे. शेकडो लोकांचा मृत्यू झाला आहे, हजारो घरे उद्ध्वस्त झाली आहेत, विजेचे खांब पडले आहेत आणि पाण्याने साचलेले ढिगारे अजूनही दिसत आहेत. जमैकामध्ये 25हजार हून अधिक लोक मदत छावण्यांमध्ये आश्रय घेत आहेत, तर हैतीमध्ये ३० लोकांचा मृत्यू झाला आहे आणि अनेक जण जखमी झाले आहेत. क्युबामध्ये घरे कोसळली आहेत, रुग्णालये आणि रस्ते खराब झाले आहेत आणि वादळामुळे देशाचे आधीच गंभीर आर्थिक संकट आणखी बिकट होऊ शकते.
वादळामुळे भीषण परिस्थिती
जमैकाच्या सेंट एलिझाबेथ जिल्ह्यातील सांताक्रूझ भागात भूस्खलनामुळे मुख्य रस्ते बंद झाले. रस्ते मातीच्या खड्ड्यात बदलले. लोक त्यांच्या घरातून पाणी काढून टाकण्याचा प्रयत्न करताना दिसले. वादळाच्या तीव्र वेगामुळे एका हायस्कूलचे छतही उडून गेले. शाळेचा वापर मदत छावणी म्हणून केला जात होता. स्थानिक रहिवासी जेनिफर स्मॉल म्हणाल्या, “मी माझ्या संपूर्ण आयुष्यात असे कधीही पाहिले नव्हते.” अनेक भागात वीज आणि दळणवळण व्यवस्था बंद असल्याने झालेल्या नुकसानीचा पूर्ण आकडा अद्याप मोजण्यात आलेला नाही. जमैकाच्या शिक्षण मंत्री डाना मॉरिस डिक्सन म्हणाल्या, “सध्या, आम्ही निश्चितपणे काहीही सांगू शकत नाही.”
