2024 मध्ये भारतात रस्त्यावरील अपघातांची संख्या प्रचंड वाढली आहे. या अपघातांमध्ये मृतांची संख्या १.७७ लाख झाली असून हा आतापर्यंतचा सर्वात जास्त आकडा आहे. २०२४ हे देशाच्या ट्रॅफिक इतिहासातील सर्वात धोकादायक वर्ष ठरले आहे. रस्ते वाहतूक आणि महामार्ग मंत्रालयाने लोकसभेत एका लिखित उत्तरात हे धक्कादायक आकडेवारी मांडली आहे. या आकडेवारीवरून असे दिसते की, जागरूकता मोहिम, बदललेली ट्रॅफिक दंड प्रणाली आणि पायाभूत सुविधा सुधारण्याच्या प्रयत्नांनंतरही भारतात रस्ते सुरक्षा स्थिती गंभीर आहे. २०२३ मध्ये मृतांची संख्या १.७३ लाख होती.
देशभरात मृत्यूंमध्ये झपाट्याने वाढ
रस्ते वाहतूक मंत्र्यांनी सांगितले की २०२४ मध्ये रस्ते अपघातात १७७,१७७ लोकांचा मृत्यू झाला. या डेटामध्ये राज्ये आणि केंद्रशासित प्रदेशांमधील अपघातांची माहिती तसेच EDAR पोर्टलद्वारे पश्चिम बंगालमधील माहितीचा समावेश आहे. राष्ट्रीय महामार्गांवरून ५४,४३३ मृत्यू झाले, जे देशातील एकूण रस्ते अपघातातील मृत्यूंपैकी अंदाजे ३१% आहेत.
उत्तर प्रदेश यादीत अव्वल आहे
सर्व राज्यांमध्ये, २०२३ आणि २०२४ मध्ये उत्तर प्रदेशमध्ये सर्वाधिक मृत्यूची नोंद झाली. २०२३ मध्ये, २३,६५२ मृत्यूंची नोंद झाली, जी २०२४ मध्ये वाढून २४,११८ झाली. २०२३ मध्ये तामिळनाडूमध्ये १८,३४७ मृत्यूंची नोंद झाली, जी २०२४ मध्ये १८,४४९ झाली. महाराष्ट्रात, मृतांची संख्या १५,३६६ वरून १५,७१५ झाली.
मध्य प्रदेशात सर्वात वेगाने वाढ
मध्य प्रदेशात सर्वात वेगाने वाढ झाली. २०२३ मध्ये १३,७९८ मृत्यू झाले आणि २०२४ मध्ये हा आकडा १४,७९१ वर पोहोचला. कर्नाटक आणि राजस्थानमध्येही थोडीशी वाढ झाली. कर्नाटकात मृत्यूची संख्या १२,३२१ वरून १२,३९० आणि राजस्थानमध्ये ११,७६२ वरून ११,७९० झाली. त्याचप्रमाणे, बिहारमध्ये ही संख्या ८,८७३ वरून ९,३४७ झाली. आंध्र प्रदेशातही ही संख्या ८,१३७ वरून ८,३४६ झाली.
२०२४ च्या आकडेवारीनुसार, पायाभूत सुविधांमध्ये प्रगती झाली असली तरीही रस्त्यावरील अपघातांमध्ये घट दिसत नाही. रिपोर्ट्सनुसार ओव्हरस्पीडिंग, मद्यपान करून वाहन चालवणे, दुर्लक्ष करून वाहन चालवणे, वाहनाचे खराब देखभाल आणि आपत्कालीन परिस्थितीत योग्य प्रतिसाद न देणे ही या अपघातांची मुख्य कारणे आहेत. यावर भर दिला जातो आहे की, कडक पोलिसींग, इंटेलिजेंट ट्रॅफिक सिस्टिमचा अधिक वापर, उत्तम ड्रायव्हर प्रशिक्षण आणि जनजागृती वाढवणे अत्यंत गरजेचे आहे.