सॅन फ्रान्सिस्को- अमेरिकेतील मराठी शाळांमध्ये शिक्षण घेणारे विद्यार्थी आणि महाराष्ट्रातील विद्यार्थ्यांचा अभ्यासक्रम सारखाच असेल, अशी शक्यता निर्माण झालेली आहे. अमेरिकेतील मराठी शाळांना राज्य सरकारतर्फे अभ्यासक्रम देऊ, असं आश्वासन राज्याचे माहिती तंत्रज्ञान आणि सांस्कृतिक कार्य मंत्री आशिष शेलार यांनी दिलंय.
अमेरिका दौऱ्यावर असणाऱ्या आशिष शेलार यांनी कॅलिफोर्निया राज्यातील सॅन फ्रान्सिस्को येथील बे एरिया येथे मराठी शाळा चालवणाऱ्या महाराष्ट्र मंडळाच्या पदाधिकाऱ्यांची भेट घेतली. यावेळी या उपक्रमाचं कौतुक करताना त्यांना अभ्यासक्रमासाठी मदत करण्याचं आश्वासन शेलार यांच्यावतीनं देण्यात आलंय.
अमेरिकेत चालतायेत मराठी शाळा
अमेरिकेत सेवा भावाने एकत्र आलेली मराठी माणसे आपल्या मुलांना मराठी भाषा, संस्कृती, इतिहास शिकवत आहेत. महाराष्ट्रातील लोकपरंपरा शिकवून “मराठीचा संस्कार” नव्या पिढीवर व्हावा म्हणून मराठी शाळा चालवत आहेत. सन 2005 पासून ही शाळा चालवली जाते. सुमारे 300 विद्यार्थी इथे मराठी शिकत आहेत. अमेरिकेत अशा 50 हून अधिक शाळा या मराठीच्या असल्याची माहितीही शेलार यांनी दिली आहे.
अमेरिकेत मिळणार मराठीची प्रमाणपत्रं
अमेरिकेतील स्थानिक प्रशासनाला जर महाराष्ट्र शासनाने शिफारस केली तसेच अभ्यासक्रम उपलब्ध करुन दिला तर मराठी भाषा शिकवणे, परीक्षा आणि प्रमाणपत्र विद्यार्थ्यांना देणे सुलभ होईल, असे या शाळेच्या पदाधिकाऱ्यांनी या भेटीत लक्षात आणून दिले. त्यानंतर याबाबतचं आश्वासन देण्यात आलंय.
याबाबत मुख्यमंत्री देवेंद्र फडणवीस आणि राज्याचे शालेय शिक्षण मंत्री दादा भूसे यांच्याशी चर्चा करुन महाराष्ट्र शासनाचे आवश्यक ते सहकार्य व शिफारस, अभ्यासक्रम नक्की देईल, असे आश्वासन मंत्री शेलार यांनी अमेरिकेतील महाराष्ट्र मंडळाला दिले आहे.
राज्यात हिंदी सक्तीच्या मुद्द्यावरुन जोरदार राजकारण तापलं. पहिलीपासून हिंदी भाषा नको यासाठी मनसे आणि ठाकरेंची शिवसेना एकत्र आली, त्यामुळं राज्य सरकारला हा निर्णय मागे घअयावा लागला. यासाठी एक समिती स्थापित करण्याचा निर्णय घअयावा लागला. अशा स्थितीत अमेरिकेत सुरु असलेल्या मराठी शाळा वेगळ्या ठरतायेत, अशा प्रतिक्रिया उमटतायेत
