पुण्यातील गणेशोत्सवाची चर्चा देशभरात पाहायला मिळते. अशा परिस्थितीत आता महापालिकेने 2025 च्या गणेशोत्सवासाठी नियमावली जाहीर केल्याची माहिती समोर येत आहे. आगामी गणेशोत्सव आणि नवरात्रोत्सवासाठी महापालिकेने नियमावली जाहीर केली आहे. त्यानुसार नव्याने महापालिका क्षेत्रात समाविष्ट गावातील मंडळांना महापालिकेची परवानगी घ्यावी लागणार आहे.
गणोशोत्सवासाठी महापालिकेची नियमावली जाहीर
शहराच्या जुन्या हद्दीतील मंडळांना २०२२पासून पुढील पाच वर्षांच्या कालावधीसाठी २०१९मध्ये दिलेल्या उत्सव मंडप, स्वागत कमानी आणि रनिंग मंडप इत्यादीच्या परवानग्या ग्राह्य धरण्यात येतील. अशा परवानाधारकांना नव्याने परवानगी घेण्याची आवश्यकता राहणार नाही, असे पालिकेने स्पष्ट केले आहे.
समाविष्ट गावामधील गणेश मंडळांना स्थानिक पोलिस, वाहतूक पोलिस; तसेच महापालिकेचे क्षेत्रीय कार्यालय यांच्यामार्फत सन २०१९मधील परवानगी घेण्यासाठी वापरण्यात आलेल्या कार्यपद्धतीचा अवलंब करून नव्याने या सर्व परवानग्या घ्याव्या लागतील. यासाठी शुल्क आकारले जाणार नाही, असे पालिकेतर्फे आयुक्त व प्रशासक नवलकिशोर राम यांनी स्पष्ट केले.
पुणे शहरात ज्या मंडळांना नव्याने गणेशोत्सव साजरा करायचा असेल किंवा पूर्वीच्या २०१९मधील परवानगीची जागा प्रकल्प बाधित झाल्याने बदल करणे आवश्यक असल्यास नवीन जागेवरील सर्व परवानग्या २०१९च्या पद्धतीनुसार घ्याव्या लागतील.
पालिकेने नेमके काय-काय नियम ठरविले?
- मंडपाची उंची ४० फुटांपेक्षा जास्त नसावी. त्याहून अधिक उंच मंडपास ‘स्ट्रक्चरल स्टॅबिलिटी’ बंधनकारक.
- मंडप व स्वागत कमानी उभारताना आपत्कालीन सेवा वाहनांसाठी रस्ते मोकळे ठेवणे बंधनकारक
- कमानींची उंची रस्त्याच्या पृष्ठभागापासून १८ फुटांपेक्षा जास्त राहील, याची दक्षता घ्यावी.
- आवश्यकतेनुसार स्वयंसेवक किंवा सुरक्षारक्षक नेमावेत.
- पर्यावरण व ध्वनिप्रदूषणासंदर्भातील सर्व नियम पाळणे बंधनकारक.
- उत्सव संपल्यानंतर संबंधितांनी तीन दिवसांच्या आत स्वखचनि मंडप, रनिंग मंडप, देखावे, विटांचे बांधकाम आणि अन्य साहित्य हटवावे
अशा प्रकारची नियमावली यंदा महापालिकेकडून जाहीर करण्यात आली आहे. गणेश मंडळांना या नियमांचे पालन करणे बंधनकारक असणर आहे. तसेच नियमांचे पालन न करणाऱ्या गणेश मंडळांना मोठा आर्थिक दंड बसू शकतो. तसेच काही मंडळांची परवानगी देखील रद्द होण्याची शक्यता आहे.
