Ganesh immersion 2025 – राज्यात गेल्या १० दिवसांपासून बाप्पा विराजमान झाले होते, मात्र काल शनिवारी अनंत चतुर्दशी दिवशी मुंबईसह राज्यातील गणपती बाप्पाचे विसर्जन झाले आहे. दरम्यान मुंबईत गणपती विसर्जनासाठी मुंबईतील समुद्रकिनारे आणि तिथली सुरक्षायंत्रणा पालिका प्रशासनाने सज्ज केली होती. तर दुसरीकडे यंदा मुंबईकरांनी पर्य़ावरणपूरक कृत्रिम तलावात मूर्ती विसर्जनाला प्राधान्य दिले आहे. मुंबईतील समुद्रकिनारे (चौपाटी) व नैसर्गिक स्थळं आणि २९० पेक्षा अधिक कृत्रिम तलावांच्या ठिकाणी पालिका प्रशासनाने तयरी केली होती.
१ लाख ८१ हजार ३७५ घरगुती गणपतीचे विसर्जन
दरम्यान, रविवार, दिनांक ७ सप्टेंबर २०२५ रोजी सायंकाळी ६ वाजेपर्यंतच्या आकडेवारीनुसार, यंदा श्रीगणेशोत्सवात एकूण १ लाख ९७ हजार ११४ मूर्तींचे विसर्जन करण्यात आले आहे. यामध्ये १ लाख ८१ हजार ३७५ घरगुती तर १० हजार १४८ सार्वजनिक श्रीगणेशमूर्ती तसेच गौरी आणि हरतालिका मिळून ५ हजार ५९१ मूर्ती समाविष्ट आहेत. महानगरपालिकेने केलेल्या प्रयत्नांचे फलित म्हणजे मुंबईतील गणेशभक्तांनी पर्यावरणपूरकतेचा अंगीकार करत कृत्रिम तलावांत मूर्ती विसर्जनाला सर्वाधिक प्राधान्य दिले.यंदा पालिका प्रशासनाने पर्यावरणपूरक गणेशोत्सवासाठी विविध उपाययोजना हाती घेतल्या होत्या. असं पालिका प्रशासनाने सांगितले आहे.
पालिकेचे १० हजार मनुष्यबळ कार्यरत
गणेशमूर्ती विसर्जनासाठी ७० नैसर्गिक स्थळं व सुमारे २९० पेक्षा अधिक कृत्रिम तलाव, छोट्या मूर्ती विसर्जनासाठी ६६ जर्मन तराफे, चौपाट्यांवर वाहने अडकू नयेत म्हणून १२०० हून अधिक स्टील प्लेट, २ हजार १७८ जीवरक्षक, ५६ मोटरबोटी, ५९४ निर्माल्य कलश आणि ३०७ निर्माल्य वाहने, विभागीय समन्वयासाठी २४५ नियंत्रण कक्ष, सुरक्षा देखरेखीसाठी १२९ निरीक्षण मनोरे, विसर्जनस्थळी ४२ क्रेन, २८७ स्वागत कक्ष, २३६ प्रथमोपचार केंद्र व ११५ रुग्णवाहिका तैनात होत्या. आपत्कालीन तयारीसाठी अग्निशमन दलाचे वाहन आदी सोयी-सुविधा अखंडपणे पुरवल्या होत्या.
तसेच पालिकेचे अधिकारी, कर्मचारी, कामगार मिळून सुमारे १० हजार मनुष्यबळ अविरतपणे कार्यरत होते. रात्रीच्या विसर्जनासाठी ६ हजार १८८ प्रखर प्रकाशझोताचे दिवे व १३८ शोधकार्यासाठीचे दिवे (सर्चलाईट्स), १९७ तात्पुरती शौचालये होते.
श्रीगणेशोत्सवादरम्यान ५०८ मेट्रिक टन निर्माल्य संकलित
मुंबईतील श्रीगणेशोत्सवादरम्यान निर्माल्यांचे संकलन करण्यासाठी बृहन्मुंबई महानगरपालिकेच्या घनकचरा व्यवस्थापन विभागाकडून विशेष प्रयत्न करण्यात आले. सार्वजनिक मंडळांकडून योग्यप्रकारे निर्माल्य संकलित केल्यानंतर त्यावर प्रक्रिया करण्यात येत आहे. मुंबईतील विविध विसर्जनस्थळी एकूण ५९४ निर्माल्य कलश आणि ३०७ निर्माल्य वाहनांची व्यवस्था करण्यात आली होती. त्याद्वारे एकूण ५०८ मेट्रिक टन निर्माल्य संकलित करण्यात आले आहे.
दिवसनिहाय श्रीगणेशमूर्ती विसर्जन
दीड दिवस – ६० हजार ४३४
पाच दिवस – ४० हजार २३०
सात दिवस – ५९ हजार ७०४
अकरा दिवस – ३६ हजार ७४६
एकूण – १ लाख ९७ हजार ११४
अकराव्या दिवशी विसर्जन झालेल्या एकूण श्रीगणेशमूर्ती-
सार्वजनिक – ५ हजार ९३७
घरगुती – ३० हजार ४९०
हरतालिका / गौरी – ३१९
एकूण – ३६ हजार ७४६
अकरा दिवसांत गौरी आणि हरतालिका मिळून ५ हजार ५९१ मूर्ती विसर्जित
