मुंबईतील वातावरणाचा दर्जा दिवसेंदिवस ढासळू लागला आहे. मुंबईला कधीकाळी स्वच्छ आणि मोकळ्या हवेचे शहर म्हणून ओळखले जात होते. तरी २०२५ या संपूर्ण वर्षात हवा प्रदूषणाच्या आकडेवारीने मोठी चिंता वाढवली आहे. मुंबईतील हवेची गुणवत्ता दिवसेंदिवस खालावत चालली आहे. या संपूर्ण परिस्थितीतमुळे शहरातील नागरिकांच्या आरोग्याला मोठा धोका निर्माण झाला आहे. मुंबईत आज सकाळी धुक्याच्या दाट थर पाहायला मिळाला. वांद्रे रिक्लेमेशन भागात आज सकाळी एक्यूआय हा 154 पोहोचला होता, जो केंद्रीय प्रदूषण नियंत्रण मंडळ (सीपीसीबी) नुसार ‘मध्यम’ म्हणून वर्गीकृत करण्यात आला आहे.
मुंबईत वायू प्रदुषण प्रचंड वाढले !
केंद्रीय प्रदूषण नियंत्रण मंडळाच्या मते, मुंबईतील वांद्रे कुर्ला कॉम्प्लेक्समधील हवेचा दर्जा निर्देशांक सकाळी 9 वाजता 157 नोंदवला गेला. मुंबईच्या इतर भागात, चेंबूर (182), कुर्ला (126), चकाला-अंधेरी पूर्व-IITM (114), माझगाव (91), मालाड पश्चिम (51), घाटकोपर (161) आणि वरळी (106) येथे AQI नोंदवण्यात आला. मुंबईतील पायाभूत सुविधांची मोठ्या प्रमाणात सुरू असलेली कामे देखील प्रदूषण वाढवू नयेत यासाठी कसून नजर ठेवली जाणार आहे. अनेक ठिकाणी ‘एअर क्वालिटी मॉनिटरिंग युनिट्स’ बसवले जात आहेत, जेणेकरून हवेतील प्रदूषणाचे प्रमाण सतत तपासता येईल आणि मानवी आरोग्यास कोणताही धोका होऊ नये याची काळजी घेता येईल. मुंबईच्या श्वासांचे रक्षण करण्यासाठी महानगरपालिका युद्धपातळीवर उपाययोजना करत आहे.
हवा प्रदुषण नियंत्रित करण्याची गरज
मुंबईसारख्या किनारपट्टीच्या शहरातही अशा उच्च प्रदूषणाची नोंद होत असल्याने, स्थानिक प्रशासनाने यावर तातडीने उपाययोजनांची अंमलबजावणी करणे गरजेचे असल्याचे या अहवालात अधोरेखित करण्यात आले आहे. वाढते शहरीकरण, औद्योगिकीकरण, वाहनांचे वाढते उत्सर्जन, बांधकाम प्रकल्प आणि कचरा जाळणे ही प्रदूषणाची प्रमुख कारणे मानली जातात. मुंबईकरांनी देखील आपल्या आरोग्याची विशेष काळजी घेण्याची गरज निर्माण झाली आहे.
दक्षिणेतील शहरांत हवा समाधानकारक
दक्षिण भारतातील चेन्नई आणि पुद्दुचेरीतील निवासी भागांमध्ये तुलनात्मकदृष्ट्या हवा अधिक स्वच्छ आढळून आली आहे. विजयवाडा आणि कोलकात्यामध्ये काही ठिकाणी प्रदूषण असले तरी, ते मुंबईतील देवनारसारख्या भागांइतके सातत्यपूर्ण आणि गंभीर नाही, असे अहवालात स्पष्ट म्हटले आहे. थोडक्यात काय तर दक्षिण भारतातील बहुतांश शहरांतील हवेची गुणवत्ता अद्याप समाधानकारक आहे, हेच यावरून स्पष्ट होते.
