दिल्लीतील सुषमा स्वराज भवन येथे बुधवारी झालेल्या जीएसटी काउन्सिलच्या मॅरेथॉन बैठकीत कर प्रणालीत मोठा बदल करण्याचा निर्णय घेण्यात आला. तब्बल 10 तासांपेक्षा जास्त चाललेल्या या बैठकीत 12 टक्के आणि 28 टक्केचे स्लॅब पूर्णपणे रद्द करण्यात आले आहेत. त्यामुळे या नव्या करप्रणालीमुळे देशातील सर्वसामान्य नागरिकांना मोठा दिलासा मिळणार आहे. केंद्र सरकारच्या या महत्त्वाच्या निर्णयामुळे व्यापारी तसेच सामान्य नागरिकांना दिलासा मिळण्याची शक्यता आहे. 22 सप्टेंबरपासून खरंतर हे नवे बदल लागू होणार आहेत. त्यामध्ये सातत्याने उपस्थित केला जाणार एक प्रश्न म्हणजे यामध्ये जुना वस्तूच्या आधीच बाजारात आल्या आहेत, त्याच्या किंमतींच काय होणार? त्याबाबत सविस्तर जाणून घेऊ…
जुन्या वस्तू’; नवा दर
लोकांच्या मनात प्रश्न आहे की दुकानांमध्ये आधीपासून ठेवलेल्या मालावर हे दर लागू होतील का? उत्तर हो आहे. सगळ्या वस्तूवर 22 सप्टेंबरपासून नवीन दर लागू होतील. याचा अर्थ असा की दुकानात जो माल आधीपासून आहे, त्यावर सुद्धा नवीन GST दर लागेल. माल जुना असो वा नवा, सगळ्यावर नवीन दर लागू होतील.
आता बहुतेक वस्तू 5 आणि 18 टक्क्यांच्या स्लॅबमध्ये येतील. काही विशिष्ट वस्तूंवर 40 टक्क्यांचा स्पेशल स्लॅब लागेल. यामुळे दुकानदारांना जुना माल लवकर विकावा लागेल. 22 सप्टेंबरपासून दुकानदारांना नवीन स्लॅबनुसार बिलिंग करावी लागेल. GST चे नवीन दर 22 सप्टेंबरपासून लागू होतील. हे दर नवरात्रीच्या पहिल्या दिवसापासून लागू होतील.
नव्या निर्णयामुळे नेमकं काय स्वस्त?
सरकारच्या या निर्णयामुळे इलेक्ट्रॉनिक वस्तू, खाद्यपदार्थ, साबण, कपडे, पादत्राणे यासह रोजच्या वापराच्या गोष्टी स्वस्त होणार आहेत. तर आरोग्य विमा आणि जीवन विम्यात पूर्ण सूट मिळण्याची शक्यता आहेत. सरकारचा हा निर्णय नवरात्रीच्या पहिल्या दिवशी म्हणजे 22 सप्टेंबरपासून लागू होणार आहे.
आरोग्य विमा,पनीर,पराठा,परोटा,खाकरा, चपाती, तंदूर रोटी, दूध, पिझ्झा , 33 जीवनरक्षक औषधे, गंभीर आणि दुर्मिळ आजारांवरची औषधं,पेन्सिल, शार्पनर,, क्रेयॉन्स , खोडरबर, वह्या, नकाशे, चार्ट, ग्लोब, इलेक्ट्रीक गाड्या, केसांचे तेल, शाम्पू, टूथपेस्ट, टूथ ब्रश, साबण, दाढीचे साबण , बटर, तूप, चीज, पाकिटातले नमकीन, भुजिया, मिक्श्चर, बाळाची दुधाची बाटली, डायपर, नॅपकिन्स , शिलाई मशिन आणि तिचे सुटे भाग , थर्मोमीटर, ग्लुकोमीटर आणि टेस्ट स्ट्रीप्स, चष्मे, रोगनिदानाची उपकरणे, ट्रॅक्टर, ट्रॅक्टरचे टायर्स, सुटे भाग, जलसिंचन, तुषारसिंचनाची उपकरणे, कृषी उपकरणे, कृषी फवारणी औषधे…
थोडक्यात काय तर दैनंदिन जीवनाशी संबंधित गरजेच्या वस्तू, औषधे, कृषी साहित्य आणि उपकरणे स्वस्त होणार आहेत.
नेमक्या कोणत्या वस्तू महाग होणार?
लक्झरी वस्तू जसे की कार, बाईक आणखी महाग होतील. यावर एक विशेष स्लॅब लावला जाईल. याशिवाय तंबाखू, पान मसाला, फ्लेवर, फ्रूट ड्रिंक आणि इतर पॅकेज्ड पेये महाग होतील. 350 सीसी पेक्षा जास्त इंजिन असलेल्या बाईक महाग होतील. त्यामुळे तुम्ही महागड्या आणि चैनीच्या वस्तू खरेदी करण्याच्या विचार जर करत असाल तर त्यावर परिस्थितीनुरूप आणि वस्तूनुसार अधिकचा कर लावला जाणार आहे. काही वस्तूवरींल 40% पर्यंत असण्याची शक्यता देखील आहे.
