भारतीय क्रिकेटपटू रवींद्र जडेजाची पत्नी रिवाबा जडेजा आता फक्त आमदार राहिलेली नाही. रिवाबा जडेजाची गुजरात सरकारमध्ये मंत्री म्हणून नियुक्ती झाली आहे, ज्याबद्दल भारतीय अष्टपैलू खेळाडूने त्याच्या पत्नीचे अभिनंदन केले. जडेजाची प्राथमिक, माध्यमिक आणि प्रौढ शिक्षण मंत्रालयात (शिक्षण मंत्रालय) नियुक्ती झाली आहे. अभिमान व्यक्त करत रवींद्र जडेजाने पत्नीला अधिक यश मिळावे अशा शुभेच्छा दिल्या.
मंत्रिपदासाठी शुभेच्छा
भारतीय क्रिकेटपटू रवींद्र जडेजाने सोशल मीडियावर पोस्ट करत आपल्या पत्नी रिवाबा जडेजा यांना मंत्रिपदासाठी शुभेच्छा दिल्या आहेत. त्याने लिहिले, “मला तुझा आणि तुझ्या यशाचा अभिमान आहे. मला माहित आहे की तू उत्तम काम करत राहशील आणि लोकांना प्रेरणा देत राहशील. गुजरात सरकारमध्ये कॅबिनेट मंत्री म्हणून तुझ्या यशासाठी शुभेच्छा!”
गुजरात सरकारने आपल्या मंत्रिमंडळात नव्या २५ मंत्र्यांना स्थान दिले आहे, ज्यात रिवाबा जडेजा यांचेही नाव आहे.
३४ वर्षांच्या रिवाबा जडेजा यांनी २०१९ साली भारतीय जनता पक्षात प्रवेश केला होता. २०२२ मधील गुजरात विधानसभा निवडणुकीत त्यांनी जामनगर मतदारसंघातून विजय मिळवून आमदारपद मिळवले. त्यांनी २०१६ साली रवींद्र जडेजासोबत लग्न केले होते. या दांपत्याला निध्याना जडेजा नावाची एक मुलगी आहे.
दक्षिण आफ्रिका मालिकेसाठी रवींद्र जडेजाची तयारी
भारतीय संघ सध्या ऑस्ट्रेलिया दौर्यावर आहे, जिथे ३ वनडे सामन्यांची मालिका १९ ऑक्टोबरपासून सुरू होत आहे. या वनडे मालिकेसाठी रवींद्र जडेजाला संधी देण्यात आलेली नाही. मात्र, त्यानंतर तो दक्षिण आफ्रिकेविरुद्ध होणाऱ्या मालिकेत खेळताना दिसू शकतो. जडेजा टी२० क्रिकेटमधून निवृत्त झाला आहे.
नोव्हेंबर-डिसेंबर दरम्यान दक्षिण आफ्रिकेचा संघ भारत दौऱ्यावर येणार आहे. त्यांच्यात दोन टेस्ट सामन्यांची मालिका होणार असून, त्यामध्ये जडेजाची पुनरागमन होण्याची शक्यता आहे. यानंतर भारत आणि दक्षिण आफ्रिका यांच्यात ३ वनडे आणि ५ टी२० सामन्यांची मालिका खेळवली जाणार आहे.
