हिंदू धर्मात मार्गशीर्ष महिना हा अत्यंत महत्त्वाचा समजला जातो. महाराष्ट्रात मार्गशीर्ष महिन्यात गुरुवारी वैभव लक्ष्मी व्रत करण्याची परंपरा आहे. या महिन्यात दर गुरुवारी घट मांडून महालक्ष्मी मातेची पूजा केली जाते. या महिन्यात स्नान करणे, दान करणे आणि दिवे लावणे यामुळे व्यक्ती सर्व पापांपासून मुक्त होते आणि मोक्ष मिळतो असे म्हटले जाते. तसेच या महिन्यात केले जाणारे कार्य अत्यंत फलदायी असते.
मार्गशीर्ष महिना कधी?
अमावस्या संपल्यानंतर मार्गशीर्ष महिन्याची सुरुवात होते. त्यामुळे, मार्गशीर्ष महिना शुक्रवार, 21 नोव्हेंबर 2025 पासून सुरु होईल. हा महिना धार्मिक पूजापाठ आणि विधींसाठी अत्यंत महत्वाचा मानला जातो. यावर्षी मार्गशीर्षमध्ये एकूण 4 गुरुवार येत आहे. पहिला मार्गशीर्ष गुरुवार हा 27 नोव्हेंबरला असणार आहे.
मार्गशीर्ष गुरुवार व्रत कधी करायचे?
पहिले मार्गशीर्ष गुरुवार व्रत हे गुरुवार, 27 नोव्हेंबर 2025 रोजी असेल.
मार्गशीर्ष महिन्यात किती गुरूवार?
- पहिला गुरूवार: 27 नोव्हेंबर
- दुसरा गुरूवार: 04 डिसेंबर
- तिसरा गुरूवार: 11 डिसेंबर
- चौथा गुरूवार: 18 डिसेंबर
मार्गशीर्ष गुरुवारचा घट कसा मांडाल?
- घट ज्या ठिकाणी मांडाल, तिथली जागा स्वच्छ करून रांगोळीने स्वस्तिक काढावा.
- त्यावर चौरंग किंवा पाट ठेवावा.
- चौरंगावर लाल कापड ठेवून त्यावर तांदूळ, त्यावर तांब्याचा कलश ठेवावा.
- कलशाला हळद-कुंकु लावून आत पाणी, अक्षता, दूर्वा, एक नाणं आणि सुपारी घालावी.
- विड्याची पाने किंवा आंब्याची डहाळी, पंचपात्र कलशावर ठेवावी, त्यावर नारळ ठेवावा.
- लाल कापडावर थोडे तांदूळ पसरवून त्यावर कलशाची स्थापना करा,
- आता त्याठिकाणी श्री लक्ष्मीदेवीचा फोटो किंवा लक्ष्मी श्रीयंत्र ठेवावे.
- कलशापुढे विडा, खोबरे, खारीक, बदाम, इतर फळे, खडीसाखर किंवा गूळ नैवेद्य म्हणून ठेवावा.
(टीप : वरील सर्व बाबी MP मराठी Breaking केवळ माहिती म्हणून वाचक-प्रेक्षकांपर्यंत पोहोचवत आहे. यातून MP मराठी Breaking कोणताही दावा करत नाही.)
