सध्या सर्वत्र लग्नसमारंभांची धामधूम सुरु आहे. हिंदू धर्मात लग्न करताना अनेक प्रथा परंपरा पाळल्या जातात. त्यापैकीच एक म्हणजे लग्नाच्यावेळी वधूला वराकडून उलटं मंगळसूत्र घातलं जाणं. अनेकांना यामागचं नेमकं कारण माहित नसतं. जाणून घेऊयात….
मंगळसुत्र उलटे घालण्यामागचे कारण
पुर्वीच्या काळी अगदी कमी वयातच मुलींचे लग्न व्हायचे. लग्न झाल्यानंतरही मुलींना वयात येण्यासाठी काही काळ बाकी असायचा. नववधू अजून आई होण्यासाठी वयात आली नाही हे दर्शवण्यासाठी तिला मंगळसूत्र उलटं घातलं जात असे. वयात आल्यावर ते सरळ करण्यात यायचं. हे मंगळसुत्र उलटे घालण्यामागचे कारण आहे.
लग्नामध्ये वधूला मंगळसूत्र उलटं घातलं जातं कारण ते तिच्या नवीन सौभाग्याचं लक्षण आहे आणि हे लोकांना कळवण्याचा एक संकेत आहे की तिचं नुकतंच लग्न झालं आहे. यामागे एक प्रथा आहे जिथे मंगळसूत्राच्या वाट्यांमध्ये हळदी-कुंकू भरले जाते आणि मंगळसूत्र उलटं घातल्यानंतर हळदी-कुंकू दिसतं. मंगळसूत्र हे पती-पत्नीमधील प्रेम आणि सौभाग्याचे प्रतीक मानले जाते.
हळदी-कुंकू भरण्यासाठी
लग्न विधीच्या वेळी, मंगळसूत्राच्या दोन वाट्यांमध्ये हळदी-कुंकू भरतात. मंगळसूत्र उलटं घातल्यामुळे या वाट्या समोर येतात. यामुळे लग्न झालेली नवीन स्त्री लगेच दिसून येते. हळदी-कुंकू घातल्यानंतर काही दिवसांनी किंवा पहिल्या सणाला मंगळसूत्र सरळ केले जाते, ज्यामुळे तिच्या नवीन वैवाहिक जीवनाची सुरुवात होते.
धार्मिक महत्त्व
मंगळसूत्र हे सौभाग्याचे प्रतीक आहे आणि उलटं घातलेले मंगळसूत्र हे तिच्या नवीन वैवाहिक जीवनाची सुरुवात दर्शवते. मंगळसूत्राला वैवाहिक सौभाग्याचे प्रतीक मानले जाते आणि ते पतीचे रक्षण करते अशी श्रद्धा आहे. उलटं घालण्याची प्रथा अनेक ठिकाणी पाळली जाते.
मंगळसुत्राच महत्त्व
मंगळसूत्र हे पती-पत्नीमधील प्रेम, आदर आणि वचनबद्धतेचं प्रतीक आहे. मंगळसूत्रातील काळे मणी नकारात्मक ऊर्जा आणि वाईट शक्तींपासून संरक्षण देतात. मंगळसूत्रामध्ये नऊ मणी असतात, जे दुर्गा देवीच्या नऊ रूपांचे प्रतीक आहेत आणि त्यामुळे महिलांना ऊर्जा मिळते. मंगळसूत्र हे स्त्रीच्या वैवाहिक जीवनाचे रक्षण करते आणि वैवाहिक जीवनातील समस्या टाळण्यास मदत करते.
(टीप : वरील सर्व बाबी MP मराठी Breaking केवळ माहिती म्हणून वाचक-प्रेक्षकांपर्यंत पोहोचवत आहे. यातून MP मराठी Breaking कोणताही दावा करत नाही.)