ज्येष्ठ अभिनेते दिलीप प्रभावळकर यांची प्रमुख भूमिका असलेला दशावतार हा सिनेमा रिलीज होऊन तीन आठवडे झाले आहेत. तिसऱ्या आठवड्यातही सिनेमाला प्रेक्षकांची दमदार प्रतिसाद मिळत आहे. सिनेमा बॉक्स ऑफिसवर तुफान कमाई करतोय. दशावतारने तिसऱ्या आठवड्यातही आपलं स्थान टिकवून ठेवलंय. बॉलिवूड सिनेमांच्या रांगेत दशावतारचे खेळ हाऊसफुल्ल सुरू आहेत.
दशावतारची दमदार कमाई सुरू
दशावतारने पहिल्या 8-9 दिवसांतच 10 कोटींहून अधिक कमाई केली होती. त्यानंतर सिनेमाचं बॉक्स ऑफिस कलेक्शन दिवसेंदिवस वाढताना दिसत आहे. तिसऱ्या आठवड्याच्या मंगळवारी देखील दशावतार सिनेमाची तिकिटं 99 रुपयांना विकण्यात आली होती. ज्याचा फायदा सिनेमाला झाल्याचं दिसतंय. दशावतार सिनेमानं दुसऱ्या आठवड्यात 10.80 कोटींची कमाई केली होती. त्यानंतर आता सिनेमाचं एकूण कलेक्शन 15 कोटींहून अधिक झालं आहे. sacnilkच्या रिपोर्टनुसार, दशावतार सिनेमाचं आतापर्यंतचं एकूण कलेक्शन हे 17 कोटी 50 लाख इतकं झालं आहे. निर्मात्यांकडून कलेक्शनचा अधिकृत आकडा अद्याप समोर आलेला नाही.
दशावतार चित्रपटाचे कथानक नेमके काय?
कोकणातील पारंपरिक लोककला आणि त्याचं मर्म समजून घेत त्या माध्यमातून कोकणातील सध्याच्या परिस्थितीवर भाष्य करण्याचा प्रामाणिक प्रयत्न दिग्दर्शक सुबोध खानोलकर यांनी केला आहे. बाप-लेकाच्या प्रेमापासून सुरू झालेली ही कथा कोकणात विकासाच्या नावाखाली निसर्गाचा नाश करू पाहणाऱ्यांच्या विरोधात संघर्ष उभा करणाऱ्या गावकऱ्यांपर्यंत येऊन पोहोचते. ही अनोखी कलाकृती मराठीसह इतर भाषिक प्रेक्षकांनाही भावली आहे.
चित्रपटाची मांडणी करताना कोकणातील जंगलं, कातळशिल्प, नदी, मंदिरं आणि तिथं रंगणारा दशावतार या सगळ्यांचा दिग्दर्शकाने सुंदर वापर करून घेतला आहे. या चित्रपटातील दृश्ये कुठेही कृत्रिम वाटणार नाही, इतक्या सुंदर पद्धतीने सिनेमॅटोग्राफ देवेंद्र गोलतकर यांनी सर्वकाही टिपलं आहे. कोकणातील घनदाट जंगलात अनुभवायला मिळणारी गूढता, शांतता जशाच्या तशा पोहोचवण्यासाठी तांत्रिक बाबींवर प्रचंड मेहनत घेतलेली दिसून येते. आगामी काही दिवसांत चित्रपटाला प्रेक्षकांची मिळणारी पसंती वाढताना दिसेल, असा जाणकारांचा अंदाज आहे.
