‘येरे येरे पैसा ३’ या सिनेमाची जोरदार चर्चा; प्रवीण तरडे यांनी शेअर केली पोस्ट, म्हणाले…

“येरे येरे पैसा ३” या मराठी चित्रपटाची सध्या जोरदार चर्चा आहे. हा चित्रपट १८ जुलैला प्रदर्शित झाला आहे आणि संजय जाधव यांनी त्याचे दिग्दर्शन केले आहे. या चित्रपटाच्या पहिल्या दोन भागांना प्रेक्षकांनी खूप चांगला प्रतिसाद दिला होता, त्यामुळे तिसऱ्या भागाची उत्सुकता सर्वांनाच आहे. ‘येरे येरे पैसा ३’ या चित्रपटात संजय नार्वेकर, सिद्धार्थ जाधव, उमेश कामत, तेजस्विनी पंडित आणि विशाखा सुभेदार यांच्या प्रमुख भूमिका आहेत. लोकप्रिय अभिनेते व दिग्दर्शक प्रवीण तरडेंनी खास पोस्ट शेअर केली आहे. त्यांनी नुकताच ‘येरे येरे पैसा ३’ हा सिनेमा पाहिला. हा चित्रपट पाहिल्यावर ते काय म्हणाले जाणून घेऊयात…

मराठी चित्रपटसृष्टीत सध्या ‘येरे येरे पैसा ३’ या चित्रपटाची जोरदार चर्चा आहे. या चित्रपटाच्या ग्रँड प्रीमियरला उपस्थित असलेले प्रवीण तरडे यांनी चित्रपटाबद्दल सकारात्मक प्रतिक्रिया दिली आहे, त्यांनी चित्रपटाचे दिग्दर्शन केलेले नसले तरी, चित्रपटाच्या टीमचे आणि संजय जाधव यांचे त्यांनी विशेष कौतुक केले आहे. प्रवीण तरडे यांनी चित्रपटाच्या प्रीमियरला उपस्थित राहून चित्रपटाबद्दल आपले विचार व्यक्त केले. त्यांनी चित्रपटाच्या टीमचे आणि दिग्दर्शक संजय जाधव यांचे कौतुक केले.

प्रवीण तरडे लिहितात, “मराठीत पण व्यावसायिक सिनेमा बनू शकतो…संजय जाधव म्हणजे दोस्तांच्या दुनियादारीतील मूळ पुरूष त्याचा सिनेमा नेहमीच उत्सुकतेचा विषय असतो… ‘येरे येरे पैसा – ३’ हा अत्यंत वेगवान पटकथा असलेला सिनेमा, खतरनाक दिग्दर्शनातून साकारलाय… भव्यतेच्या बाबतीत सुधीर कोलते, ओमकार माने, अमेय खोपकर आणि इतर निर्मात्यांनी मराठी सिनेमाला निर्मितीच्या क्षेत्रात दोन पावलं पुढं नेलंय… अभिनयाची मांदियाळीही कमाल जमून आलीये… सिध्दार्थ जाधव आणि उमेश कामत दोघं अभिनयाच्या ताकदीवर सिनेमात भाव खावून जातात.. संजय नार्वेकर आणि तेजस्विनी पंडित सलग तीन भागात तशीच अप्रतिम बॅटिंग करताहेत… नागेश भोसले, जयवंत वाडकर, वनिता खरात, विशाखा सुभेदार, आनंद इंगळे तुम्ही सगळे कमाल आहात आणि शेवटी शेवटी आलेला ईशान खोपकर तुझी एनर्जी जबरदस्त आहे.. संजय जाधव आणि टीमला खूप शुभेच्छा! नक्की बघा ‘येरे येरे पैसा – ३’.”

‘येरे येरे पैसा ३’

‘येरे येरे पैसा ३’ हा ‘येरे येरे पैसा’ फ्रँचायझीचा तिसरा भाग असून १८ जुलैला तो प्रदर्शित झाला. चित्रपटाच्या गाण्यांचीही खूप चर्चा आहे, विशेषत: ‘जेन झी’ ब्रेकअप साँग ‘उडत गेला सोन्या’. या गाण्यात ईशान खोपकर, सोनाली खरे यांच्यासह अनेक कलाकार दिसणार आहेत.