मराठी टेलिव्हिजनवर ‘बिग बॉस मराठी’च्या मंचावरून घराघरांत पोहोचलेला सूरज चव्हाण (Suraj Chavan) पुन्हा एकदा चर्चेत आला आहे. यावेळी कारण आहे त्याच्या वैयक्तिक आयुष्यातील एक मोठा बदल—लग्न! काही दिवसांपासून सोशल मीडियावर सूरजच्या लग्नाच्या चर्चा रंगल्या होत्या, आणि आता त्यावर कोकणहार्टेड गर्ल अंकिता वालावलकरच्या व्हिडिओ पोस्टने अधिकृत शिक्कामोर्तब केलं आहे.
सूरजच्या नव्या प्रवासाला शुभेच्छा Suraj Chavan
‘बिग बॉस मराठी’च्या पाचव्या पर्वाचा विजेता ठरल्यानंतर सूरजने सोशल मीडियावर आपली एक वेगळी ओळख निर्माण केली. इन्फ्लुएन्सर म्हणून त्याने स्वतःचं स्थान मजबूत केलं असून, त्याच्या प्रत्येक पोस्टकडे नेटकरी लक्ष ठेवून असतात. काही दिवसांपूर्वी सूरजने एका दाक्षिणात्य पोशाखातील मुलीसोबत फोटो शेअर केला होता. त्यावरून चाहत्यांमध्ये अंदाज सुरू झाले हा फोटो खरंच लग्नाचा की एखाद्या नव्या प्रोजेक्टचा भाग?
अफवांना पडला पूर्णविराम
ही चर्चा एका टप्प्यावर थांबली जेव्हा सूरजची खास मैत्रीण आणि ‘बिग बॉस’मधील त्याची बहीण अंकिता वालावलकरने एक व्हिडिओ शेअर केला. या व्हिडिओमध्ये ती बारामतीत सूरजच्या नव्या घराला भेट देताना दिसते. या भेटीत सूरजने तिला त्याच्या होणाऱ्या पत्नीची ओळख करून दिली. फोटोमध्ये तिचा चेहरा जरी झाकलेला असला तरी, त्यातून दिलेला संदेश मात्र स्पष्ट होता—सूरज लवकरच बोहल्यावर चढणार आहे.
लग्नाची अधिकृत घोषणा अद्याप बाकी
अंकिताच्या इंस्टाग्राम पोस्टमधून ही बातमी बाहेर आली असली तरी सूरजकडून (Suraj Chavan) अद्याप कोणतीही औपचारिक घोषणा करण्यात आलेली नाही. त्यामुळे त्याच्या चाहत्यांना आता वाट पाहावी लागणार आहे की सूरज स्वतः कधी आणि कशा पद्धतीने ही गोड बातमी शेअर करतो. व्हिडिओमध्ये सूरजच्या नव्या घराची झलक देखील पाहायला मिळाली. हे घर त्याच्या मेहनतीचं प्रतीक आहे. अजून घरातील काही काम बाकी असलं तरी त्याचा नव्या जीवनप्रवासासाठीचा सज्जपणा मात्र स्पष्ट आहे. त्याच्या आयुष्यातील या नव्या वळणावर अंकिताने दिलेल्या शुभेच्छाही याचं प्रमाण आहेत.
चाहत्यांची उत्सुकता शिगेला
आता ‘सूरजच्या लग्नात कोण कोण असणार?’, ‘कोण आहे ती भाग्यवती?’ आणि ‘लग्नसोहळा कधी आणि कुठे होणार?’ अशा अनेक प्रश्नांनी चाहत्यांच्या मनात घर केलं आहे. दरम्यान, सूरजच्या सोशल मीडिया पोस्ट्सवर नजरा लागून राहिल्या आहेत. कदाचित तोच लवकरच या सगळ्या प्रश्नांची उत्तरं देईल.