पुण्यातील गणेशोत्सव हा महाराष्ट्रातील एक अतिशय प्रसिद्ध आणि सांस्कृतिक दृष्टीने महत्त्वाचा सण मानला जातो. पुण्यातील गणेशोत्सव जगभरात लोकप्रिय आहे. सार्वजनिक गणेश मंडळांच्या मिरवणुका, आकर्षक सजावट, दिव्य रोषणाई आणि विविध सांस्कृतिक कार्यक्रमांमुळे पुण्यातील गणेशोत्सवाची लोकप्रियता दिवसेंदिवस वाढत आहे. गणेश विसर्जन मिरवणुकींना विशेष महत्त्व आहे. ढोल-ताशांच्या गजरात, लेझीम पथकांच्या तालावर आणि पारंपरिक तसेच आधुनिक कलांच्या सादरीकरणात हजारो भाविक उत्साहाने सहभागी होतात. पुण्याच्या मिरवणुका सामाजिक एकात्मता, भक्तीभाव आणि सांस्कृतिक वारसा यांचे अनोखे दर्शन घडवतात. त्यामुळे पुण्यातील गणेशोत्सव आणि विसर्जन मिरवणुकींना जागतिक स्तरावरही लोकप्रियता लाभत आहे. अशा परिस्थितीत 2025 च्या गणेश विसर्जन मिरवणुकांबाबतचे नियोजन समोर आले आहे.
पुण्यातील विसर्जन मिरवणुकांचे वेळापत्रक समोर
पुण्यातील मानाच्या गणपतींच्या विसर्जन मिरवणुकीसंदर्भात यंदाचे वेळापत्रक आणि मार्ग जाहीर करण्यात आला आहे. पोलिस आयुक्त अमितेश कुमार यांनी याची माहिती देत मिरवणूक शिस्तबद्ध, सुरक्षित आणि वेळेत पार पडावी यासाठी नियमावली लागू केली असल्याचे सांगितले. शहरातील नागरिक आणि गणेश मंडळांना या नियमानुसारच सहभागी व्हावे, असे आवाहनही प्रशासनाकडून करण्यात आले आहे.
मानाच्या गणपतींच्या मिरवणुकांचे नियोजन
पुण्याचा पहिला मानाचा कसबा गणपती सकाळी 9:15 वाजता मंडईतील टिळक पुतळा येथे पोहोचेल. त्यानंतर सकाळी 9:30 वाजता मिरवणुकीची सुरुवात होईल. कसबा गणपती सकाळी 9:30 वाजता बेलबाग चौकात दाखल होऊन 10:15 वाजता लक्ष्मी रोडकडे मार्गस्थ होईल. दुसरा मानाचा तांबडी जोगेश्वरी गणपती सकाळी 10:30 वाजता बेलबाग चौकातून लक्ष्मी रोडकडे जाईल. सहावा मानाचा महापालिका गणपती आणि सातवा त्वेष्ट कासार गणपती दुपारी 1:00 वाजता मिरवणुकीत सामील होतील.
लक्ष्मी रोड आणि शिवाजी रोडवरील मंडळे दुपारी 3:45 वाजता मुख्य मिरवणुकीत सामील होतील. श्रीमंत दगडूशेठ गणपती दुपारी 4:00 वाजता, तर जिलब्य मारुती आणि अखिल मंडई गणपती मंडळ संध्याकाळी 5:30 नंतर मिरवणुकीत सहभागी होतील. प्रशासनाच्या नियोजनानुसार संध्याकाळी 7:00 वाजेपर्यंत बेलबाग चौक रिकामा करण्यात येणार आहे.
मार्गदर्शक नियमांचे पालन करावे लागणार
मंडळांना ठरवून दिलेल्या मार्गानेच विसर्जन मिरवणुकीत सामील होता येणार आहे. लक्ष्मी रोडवरील मंडळे फक्त बेलबाग चौकातून प्रवेश करतील. कसबा गणपती जाईपर्यंत अलका टॉकीज चौकाजवळ इतर मंडळांना थांबावे लागेल. मिरवणुकीदरम्यान मंडळांमध्ये अंतर राखणे बंधनकारक असून रेषा तोडण्यास परवानगी नाही. टिळक पुतळा ते बेलबाग चौक या दरम्यान ढोल-ताशा वाद्य वाजवण्यास बंदी आहे. फक्त बेलबाग चौकानंतरच त्यांना परवानगी दिली जाईल. प्रत्येक मंडळाला डीजे किंवा ढोल-ताशा पथक यापैकी एकच ठेवता येईल. जास्तीत जास्त 2 ढोल-ताशा गटांना परवानगी असून प्रत्येकीत 60 सदस्य असतील. तसेच ढोल-ताशा गटांनी विसर्जनानंतर अलका टॉकीज चौकात परतीच्या मार्गाने जाऊ नये, अशी स्पष्ट सूचना देण्यात आली आहे. त्यामुळे पुण्यातील गणेश विसर्जन मिरवणुकांबाबत प्रशासनाकडून विशेष नियोजन खरंतर यावेळी करण्यात आले आहे.
