सोयाबीन बाजारात सध्या दरांमध्ये मोठी चढ-उतार पाहायला मिळत आहे. नव्या हंगामातील आवक वाढत असताना काही बाजार समित्यांमध्ये दर वाढताना दिसत आहेत, तर काही ठिकाणी घसरण नोंदली जात आहे. मात्र एकुणच राज्यातील बाजार समित्यांमध्ये सध्या दरामध्ये चांगली सुधारणा पाहायला मिळत आहे. दर वाढताना दिसत आहेत. डिसेंबरच्या दुसऱ्या आठवड्यात राज्यातील विविध कृषी उत्पन्न बाजार समित्यांमध्ये सोयाबीनची आवक मोठ्या प्रमाणात झाली असून, दरांमध्ये ठिकठिकाणी चढउतार नोंदवले गेले आहेत. काही बाजारांमध्ये चांगला भाव मिळत असताना काही ठिकाणी अपेक्षेपेक्षा कमी दराने व्यवहार झाल्याचे दिसत आहे. आज बुधवार, 10 डिसेंबर रोजी दरांची नेमकी काय स्थिती राहिली, ते जाणून घेऊ…
बुधवार, 10 डिसेंबर – सोयाबीनचे दर
आज 10 डिसेंबर 2025 रोजी वाशिम जिल्ह्यातील मालेगाव बाजार समितीत 200 क्विंटल सोयाबीनची आवक झाली. येथे किमान 4100 रुपये, कमाल 4500 रुपये तर सरासरी 4400 रुपये दर नोंदवला गेला. याच दिवशी मुरुम बाजारात 241 क्विंटल पिवळ्या सोयाबीनची आवक असून सरासरी दर 4221 रुपये राहिला. बुलढाणा आणि आर्णी या बाजारांमध्येही सोयाबीनला समाधानकारक भाव मिळाल्याचे दिसून आले.
महाराष्ट्रातील सोयाबीन दराची स्थिती
9 डिसेंबर रोजी विविध बाजार समित्यांमध्ये मोठ्या प्रमाणावर आवक नोंदवली गेली. कारंजा बाजारात तब्बल 8 हजार क्विंटल सोयाबीनची आवक झाली असून येथे सरासरी दर 4260 रुपये राहिला. अमरावती बाजार समितीत 6741 क्विंटल आवकेसह सरासरी दर 4200 रुपये नोंदवण्यात आला. अकोला, यवतमाळ, हिंगोली, नागपूर आणि कोपरगाव या भागांतही सोयाबीनचे व्यवहार नियमित सुरू होते.
विशेष बाब म्हणजे काही बाजारांमध्ये उच्चांकी दर नोंदवले गेले. कोरेगाव आणि किनवट बाजारात सोयाबीनला थेट 5328 रुपये प्रति क्विंटल असा दर मिळाल्याने शेतकऱ्यांना मोठा दिलासा मिळाला आहे. वाशीम बाजारातही कमाल दर 5700 रुपयांपर्यंत पोहोचले असून सरासरी दर 5500 रुपये राहिला. मंगळूरपीर-शेलूबाजार येथेही उच्च दरात व्यवहार झाल्याचे दिसून आले.
दुसरीकडे, काही बाजारांमध्ये कमी दरांनी शेतकऱ्यांची चिंता वाढवली आहे. वरोरा-शेगाव येथे किमान दर तब्बल 2200 रुपयापर्यंत खाली घसरला, तर वणी, हिंगणघाट आणि आर्वी येथेही दर अपेक्षेपेक्षा कमी राहिले. दर्जा, ओलावा, वजन आणि साठवणुकीची स्थिती यावर दर अवलंबून असल्याचे व्यापऱ्यांचे म्हणणे आहे.
दरातील वाढीमुळे शेतकऱ्यांमध्ये समाधान
राज्यातील सोयाबीन बाजारात सध्या तेजीचे वातावरण पाहायला मिळत असून शेतकऱ्यांसाठी दिलासादायक परिस्थिती निर्माण झाली आहे. राष्ट्रीय स्तरावर सोयाबीन आणि सोयाबीन तेलाच्या मागणीत लक्षणीय वाढ झाल्याचा थेट परिणाम बाजारभावावर दिसून येत आहे. अवघ्या दोन दिवसांतच सीड क्वालिटी सोयाबीनच्या दरात जवळपास एक हजार रुपयांची वाढ नोंदवली गेली असून, मील क्वालिटी सोयाबीनच्या दरातही मोठी उसळी दिसत आहे. यामुळे सोयाबीनचे दर लवकरच हमी भावाचा टप्पा ओलांडतील, अशी शक्यता बाजार तज्ज्ञ व्यक्त करत आहेत.
मागील काही दिवसांपासून राज्यातील बहुतांश बाजार समित्यांमध्ये सोयाबीनची आवक घटत चालली आहे. शेतकऱ्यांकडील साठा मर्यादित राहिला असून अनेक शेतकरी सध्या भाववाढीच्या अपेक्षेने माल बाजारात आणत नाहीत. याउलट प्रक्रिया उद्योग, तेल उत्पादक कंपन्या आणि व्यापाऱ्यांकडून सोयाबीनची मागणी वाढत आहे. या मागणी-पुरवठ्यातील तफावतीमुळे दराला जोरदार आधार मिळत असल्याचे चित्र आहे.
